Ռուսաստանն ու Թուրքիան համաձայն են այն հարցում, որ Լեռնային Ղարաբաղում իրավիճակը չպետք է օգտագործվի տարածաշրջան օտարերկրացի վարձկանների ներթափանցման համար: Այս մասին հայտարարել է Ռուսաստանի արտգործնախարար Սերգեյ Լավրովը Թուրքիայի իր գործընկեր Մեւլութ Չավուշօղլուի հետ հանդիպմանը: «Մեր ընդհանուր կարծիքն այն է, որ Լեռնային Ղարաբաղում իրավիճակը չպետք է օգտագործվի այդ տարածաշրջան օտարերկրացի վարձկանների ներթափանցման փորձերի համար: Այս հարցում մենք մեր թուրք գործընկերոջ հետ միանգամայն միասնական դիրքորոշում ունենք»,- ասել է նա:
Լավրովը նշել է, որ իրենք ողջունում են Անկարայի ջանքերը՝ նպաստել կողմերի՝ եռակողմ համաձայնագրով ստանձնած պարտավորությունների կատարմանը, այդ թվում կրակի դադարեցման ռուս-թուրքական համատեղ մոնիթորինգի կենտրոնի ստեղծմանը: Նա հիշեցրել է, որ կենտրոնը ստեղծվում է Ռուսաստանի և Թուրքիայի նախագահների պայմանավորվածությունների արդյունքում և այժմ «տեղի է ունենում դրա ակտիվ տեղակայման գործընթաց»:
Պատրաստեց Վիկտորյա ԱՆԴՐԵԱՍՅԱՆԸ
