Բարձրագույն դատական խորհրդի (ԲԴԽ) վարչական շենքում հրավիրված տարեվերջյան ամփոփիչ մամուլի ասուլիսում ԲԴԽ նախագահ Ռուբեն Վարդազարյանը, անդրադառնալով Նիկոլ Փաշինյանի՝ «լուծենք դատարանների հարցը, հետո կանցնենք ընտրություններին» հայտարարություններին, ասաց. «Եվրոպայի դատավորների խորհրդատվական խորհուրդը, որը սահմանում է այն հիմնարար սկզբունքները, որոնք վերաբերում են ԵԽ անդամ երկրների դատավորներին, նաև ունի թիվ 18-րդ կարծիքը: Լեյտմոտիվն այն է, որ իշխանության թևերի միջև կոնֆլիկտը նորմալ է: Կոնֆլիկտի բացակայությունը նշանակում է, որ դիկտատուրա է: Ես կապը չեմ տեսնում: Դատարանները որևէ առնչություն չունեն որևէ ընտրական գործընթացի հետ: Այո, եկեք լուծենք դատական իշխանության հարցերը: Եկեք մեր ֆինանսավորումը բարձրացնենք, մեզ թափուր հաստիքներ տվեք, մեր շենքերը վերանորոգեք»:
Լրագրողների հարցին՝ արդյոք ԲԴԽ նախագահին հաջողվե՞լ է պարզել՝ կա՞ն դատարանների պատերի տակ «վնգստացող դատավորներ», ինչպես Նիկոլ Փաշինյանն էր ասում, Ռուբեն Վարդազարյանը պատասխանեց. «Գտնում եմ՝ այսօր պատմական պահն այնպիսին է, որ մենք կարող ենք ունենալ, ստեղծել, հիմքերը դնել անկախ դատական համակարգ ունենալու: Պատերի տակ վնգստացող արտահայտության մասին ասել ենք՝ այո, մենք ունենք նման դատավորներ և մենք նրանց անունները գիտենք: Այսօր էլ այդ անունները չեմ հրապարակի: Շատ կուզեմ՝ գոնե 1.5 տարի հետո ՀՀ դատական իշխանությունում վնգստացող դատավորների թիվը լինի 0»:
Ռուբեն Վարդազարյանն անդրադարձավ նաև ԱԱԾ տեսանյութին, որտեղ քննարկում էին դատավորի պահվածքը ու այս առիթով ասաց. «Եթե դա իրականություն է, ապա մտահոգում է միանշանակ: Երկու քաղաքացի իրար հետ զրուցում են և խոսում են երրորդ անձի մասին: Եթե դա իրականություն է, կոչ եմ անում ՀՔԾ-ին զբաղվել, եթե այդտեղ կան քրեական պատասխանատվության հիմքեր, եթե չկան քրեական պատասխանատվության հիմքեր, ապա կարգապահական պատասխանատվության հիմքեր պիտի լինեն: Դատավորների ընդհանուր ժողով և արդարադատության նախարարություն խնդրում եմ արձագանքեք, հակառակ դեպքում, քանի դեռ չկան այդ վարույթները, ես դա համարում եմ որպես բամբասանք: Մեզ անհրաժեշտ է, որ վարույթ լինի, որ ես կարողանամ գնահատական տալ և ինչ-որ փաստով ասել այդպես է, թե՝ ոչ»:
Կարդացեք նաև
Տաթև ՀԱՐՈՒԹՅՈՒՆՅԱՆ
