ՀՀ ԱԺ փոխնախագահ Ալեն Սիմոնյանը լրագրողների հետ ճեպազրույցում պարզաբանեց՝ Հայաստանը ՀԱՊԿ-ին անդամակցում է իր սահմաններով, և ՀԱՊԿ անդամ չի այն տարածքը, որը ԼՂՀ-ի Սահմանադրությամբ ամրագրված է և հանդիսանում է ԼՂՀ: Նա ասաց. «Դրա համար ՀԱՊԿ-ում նման գործընթաց սկսելը՝ նաև հաշվի առնելով, որ ՀԱՊԿ-ում կան երկրներ, որոնք սերտ գործընկերային հարաբերություններ ունեն Ադրբեջանի հետ, կարող էր լինել անարդյունք»:
Լրագրողները հիշեցրին՝ մամուլում տեղեկություններ են շրջանառվում այն մասին, որ ԲՀԿ-Նիկոլ Փաշինյան հանդիպման ժամանակ ընթանալու է նախարարական պորտֆելների փոխանակում ԲՀԿ-ի հետ: Այս առիթով Ալեն Սիմոնյանն ասաց. «Նման բանի մասին խոսել չի կարելի: Եղել է Նիկոլ Փաշինյանի առաջարկը հանդիպման հետ կապված: Ուրախ եմ, որ թե ԲՀԿ-ն, թե ԼՀԿ-ն թե այլ կուսակցություններ, որոնք արդեն հայտարարել են, պատրաստ են այդ քննարկումներին»:
Հարցին՝ պատրա՞ստ եք ձեր ընդդիմության հետ պորտֆելներ կիսել, Ալեն Սիմոնյանը պատասխանեց. «Ես չասացի, որ մեր կուսակցությունում նման բան է քննարկվում: Քաղաքական գործընթացներ են ընթանում»:
Ալեն Սիմոնյանը հրաժարվեց արձագանքել լրագրողների այն փաստմանը, թե Սյունիքում արդեն «Բարի գալուստ Ադրբեջան» մակագրությամբ ցուցանակ է տեղադրվել:
Կարդացեք նաև
Լրագրողները հետաքրքրվեցին՝փաստաթղթի գաղտնի մաս գոյություն ունի՞, Ալեն Սիմոնյանը հավաստիացրեց՝ նման բան չկա. «Նույնիսկ այն բառերը, որ օգտագործում են՝ դեմարկացիա և այլն, դրա մասին խոսք չկա: Խոսքը նրա մասին է, որ ադրբեջանցիները մի կողմում են կանգնում, հայերը՝ մյուս, և ռուս խաղաղապահներն ապահովում են խաղաղություն»:
Լրագրողները հիշեցրին՝ վարչապետն ասում է բանավոր պայմանավորվածություններ կան, Դուք ասում եք՝ չկան գաղտնի, այլ պայմանավորվածություն, Ալեն Սիմոնյանն արձագանքեց. «Չկա հակասություն: Բանավոր պայմանավորվածությունները ռուսական կողմի հետ են. օրինակ՝ բանավոր պայմանավորվածության հիման վրա հանդիպում է նախատեսվում»:
Ալեն Սիմոնյանը նշեց, թե ամպագորգոռ հայտարարությունները՝գնում ենք, Աղդամը վերցնենք և այլն վնասելու են: Լրագրողները հիշեցրին ինքն էլ ասում էր՝ Աղդամն իմ հայրենիքն է, մի՞թե նման հայտարարությունները վտանգավոր չէին, Ալեն Սիմոնյանը պատասխանեց. «Դա իմ անձնական վերաբերմունքն է այն սահմաններին, որով Արցախի սահմաններն են գծված: Ես հիմա էլ եմ համարում, որ այն տարածքները, որոնք գրավված են Ադրբեջանի կողմից, պատմական Հայաստանի տարածքներն են»:
Լրագրողները հարցրին՝ Վիտալի Բալասանյանի՞ն նկատի ունի, քանի որ նա էր նման հայտարարություն արել¸Ալեն Սիմոնյանն ասաց՝ եթե անուններ տալու կարիք լիներ, ինքը դա կաներ:
Տաթև ՀԱՐՈՒԹՅՈՒՆՅԱՆ
