Հայրենիքի փրկության շարժման երթը հասավ Հատուկ քննչական ծառայության շենքի մոտ։
Շարժման իրավական հանձնաժողովի նախագահ, «Մեկ Հայաստան» կուսակցության նախագահ Արթուր Ղազինյանն ասաց, որ պահանջում են օրենքով և Սահմանադրությամբ ՀՔԾ-ին վերապահված լիազորությունների և գործառույթների արդյունավետ իրականացում։ Նա նշեց, որ մինչ այժմ ներկայացրել են երեք հաղորդում հանցագործության մասին՝ երեքն էլ պետական դավաճանության հատկանիշներով, երկու քրեական գործ է հարուցվել, որոնցում ներգրավված է որպես վկա։
«Երկու դեպքով էլ, ես վստահ եմ՝ մյուս վկաները նույնպես, ներկայացրել եմ պետական դավաճանության անհերքելի, ակնհայտ, անվիճելի փաստեր։ Մինչդեռ, առաջին քրեական գործը, որ քննվում է այս կառույցում, հարուցված է Քրեական օրենսգրքի 308 հոդվածի 2-րդ մասով, այսինքն՝ պաշտոնեական լիազորությունների չարաշահում, որը անզգուշությամբ հասցրել է ծանր հետևանքների։ Այստեղ անզգուշություն գոյություն չունի. կա ուղղակի դիտավորություն, ծրագրավորած, պլանավորած, միտումնավոր, համակարգված պետական դավաճանություն»,- ասաց Արթուր Ղազինյանը:
Նա հայտարարեց, որ հանցագործությունը շարունակվում է և պետք է անհապաղ ձերբակալել Նիկոլ Փաշինյանին՝ պետական դավաճանության հոդվածով՝ դրանով կանխելով Գեղարքունիքի և Տավուշի մարզերի սահմանամերձ գյուղերի և կարևոր ենթակառուցվածքների նվիրաբերումը Ադրբեջանին․ «Գլխավոր մեղադրյալ, գերագույն և գլխավոր դավաճան Նիկոլ Փաշինյանը իր վերջին, չգիտեմ, թե ոնց անվանեմ՝ հարցազրույց էր, թե ի՞նչ է, խոստովանեց, հարգելի՛ քննիչներ, հարգելի՛ իրավաբաններ, նա տվեց ինքնախոստովանական ցուցմունք, որից հետո նա պետք է անմիջապես ձերբակալվեր։ Նա ասաց, որ բանավոր համաձայնության հիմքով Ադրբեջանին են հանձնվում հայկական ինքնիշխան տարածքներ, որի իրավունքը ինքն ուղղակի չունի»։
Կարդացեք նաև
Ամի ՉԻՉԱԿՅԱՆ
