Վազգեն Մանուկյանի խոսքին, որ եթե լինի արտահերթ ընտրություններ, արյունահեղություն է լինելու ամեն քվեատուփի մոտ՝ ԱԺ-ում անդրադարձավ իմքայլական Արման Եղոյանը՝ ասելով, որ ներքին կայունության դեմ քայլեր են սրանք. «Ես հիշեցնեմ, որ սա 96 թվականը չի, երբ արյունահեղություն էր լինում ԱԺ-ում՝ մի քանի սենյակ այն կողմ: Սա 2008-ի Ազատության հրապարակը չի, երբ էլի արյունահեղություն եղավ հրապարակում, հետո՝ Մյասնիկյանի արձանի մոտ, սա նույնիսկ 2020-ի նոյեմբերի 9-ը չի, որ էլի արյունահեղություն լինի կառավարական առանձնատներում, մահափորձ ԱԺ նախագահի դեմ: Ո՞վ պիտի անի այդ արյունահեղությունը, ի՞նչ արյունահեղության մասին է խոսքը, ո՞վ պետք է անի դա՝ «Իմ քայլի» ընտրողնե՞րը, թե՞ իրենց ընտրողները, թե՞ այն փողոցային թափթփուկները, որոնք ընտրությունից ընտրություն շրջում էին ընտրատեղամասերում ու սադրանքներ անում եւ հիմա, օգտվելով իրավիճակից, ծակերից դուրս են եկել: Ի՞նչ են ուզում, ի՞նչ են ակնարկում, ո՞ւմ են վախեցնում, սա ի՞նչ խոսելաձեւ է: Սա պետական այրի կո՞չ է»:
Եղոյանը կոչ արեց քաղաքացիներին չտրվել նման սադրանքների ու պահպանել ներքին կայունությունը: Իսկ ընդդիմությանը նա կոչ արեց գալ կառուցողական դաշտ ու քննարկել երկիրն այս վիճակից հանելու ուղիները:
Հռիփսիմե ՋԵԲԵՋՅԱՆ
