ԱԺ «Լուսավոր Հայաստան» խմբակցության քարտուղար Անի Սամսոնյանը ֆեյսբուքյան իր էջում գրել է. «Ազգային ժողովի դիմաց բողոքի ակցիաները հասկանալի են և որպես մարդու` իր դժգոհության ձայնն արտահայտելու իրավունք` ընդունելի: Բայց դրանց իմաստը և նշանակությունը վարկաբեկվում է, երբ գործի են դրվում հայհոյանքն ու բռնությունը:
Երկու տարի առաջ իմ բարձրացրած մտահոգությունն առ այն, որ «Իմ քայլը» իշխանության կողմից ցանած ատելության սերմերը դառնալու են կործանարար մեր պետության և հասարակության համար, հանդիպում էր հեգնանքի ու քմծիծաղի:
Այժմ մենք ապրում ենք քաղաքական ատելության գորշ, հյուծող իրականության մեջ:
Ազգային ժողովի պատգամավորների վրա հայհոյանքով հարձակումներով ո´չ վարչապետին իր աթոռից կզրկեք և ո´չ էլ ձեր ուզած մարդուն կկարգեք վարչապետ: Վերադարձնելով իմքայլականներին նրանց գեներացրած սևի ատելությունը և ցավեցնելով նրանց` ոչ մի հարց չի լուծվելու: Դա ոչ մի տեղ տանող ճանապարհ է:
Կարդացեք նաև
Պատգամավորների նկատմամբ տարատեսակ հարձակումները անընդունելի են: Կոչ եմ անում բոլորին իրենց արդարացի պայքարը կազմակերպել ավելի զուսպ և խելացի, որպեսզի դրանք ընկալելի և հարգելի լինեն հանրության կողմից»:
