Աշխատանքի եւ սոցիալական հարցերի նախարար Մեսրոպ Առաքելյանը, որը մինչ այս պաշտոնի նշանակումը աշխատել է «ՄՈԳՈ» վարկային կազմակերպության գործադիր տնօրեն, ընդունում է՝ այդ վարկային կազմակերպության տոկոսադրույքները բարձր են։ Այսօր հրավիրած ասուլիսում լրագրողներից մեկի հարցին՝ մի երկրում, որտեղ ամեն երրորդն աղքատ է, ամեն հինգերորդը՝ ծայրահեղ աղքատ, սոցապ նախարար են նշանակում մի մարդու, որը տնօրեն էր մի կազմակերպության, որը ահռելի բարձր տոկոսով վարկեր է տրամադրել, նախարարը պատասխանեց․«Դուք ասում եք՝ 400 տոկոս տոկոսադրույք վարկ, նման բան չկա»։
Ճշտող հարցին՝ արդյոք բարձր չէ այդ կազմակերպության տոկոսադրույքը, նախարարը պատասխանեց․ «Եղել է բարձր։ Ես աշխատել եմ վարկային կազմակերպությունում գործադիր տնօրեն այնպես, ինչպես դրանից առաջ աշխատել եմ տարբեր բանկերում, կատարել եմ օրենքով սահմանված աշխատանք։ Ինչ վերաբերում է նրան, թե արդյոք կապ ունի իմ աշխատանքը այսօրվա իմ զբաղեցրած պաշտոնի հետ՝ կապ չունի այնքանով, որքանով տարբեր ոլորտում են, եւ այն աշխատանքը, որը կատարում եմ, դրա գնահատականը տրվում է որպես նախարար իմ կատարած աշխատանքով»։
Նելլի ԲԱԲԱՅԱՆ
