ՀՀ վարչապետի, Ռուսաստանի Դաշնության և Ադրբեջանի Հանրապետության նախագահների կողմից ս.թ. նոյեմբերի 9-ին ստորագրած տխրահռչակ հայտարարության 1-ին կետով սահմանվել է, որ «Հայտարարվում է Լեռնային Ղարաբաղի հակամարտության գոտում կրակի և բոլոր ռազմական գործողությունների լիակատար դադարեցման մասին 2020 թվականի նոյեմբերի 10-ին Մոսկվայի ժամանակով 00:00-ից: Ադրբեջանի Հանրապետություն և Հայաստանի Հանրապետությունը, այսուհետ՝ Կողմեր, կանգ են առնում իրենց զբաղեցրած դիրքերի վրա»։
Ինչպես վերը նշված, այնպես էլ հայտարարության մնացած դրույթներում Հայաստանի և Ադրբեջանի պետական սահմանների հստակեցման, սահմանագծերի որոշման և անցկացման մասին որևէ հիշատակում առկա չէ:
Ավելի՛ն, այս համատեքստում, մեծագույն ցանկության դեպքում անգամ Սյունիքի մարզի սահմանակից տարածքները չեն կարող ընկալվել որպես Լեռնային Ղարաբաղի հակամարտության գոտի:
Միջազգային իրավունքի կանոնների համաձայն՝ սահմանների դեմարկացիան և դելիմիտացիան իրականացվում է հարևան պետությունների փոխադարձ համաձայնությամբ, երբ անհրաժեշտություն է առաջանում որոշել սահմանների ճիշտ տեղը կամ լուծել դրանց հետ կապված խնդիրները, որի նպատակով սահմանակից պետությունների միջև ստեղծվում է դելիմիտացիոն և դեմարկացիոն հանձնաժողովներ։
Կարդացեք նաև
«Պետական սահմանի մասին» ՀՀ օրենքով ամրագրված է, որ պետական սահմանը որոշվում է ՀՀ միջազգային պայմանագրերով և ՀՀ օրենքով:
Պետական սահմանը տեղորոշելիս և փոփոխելիս, սահմանակից պետությունների հետ հարաբերությունները, ինչպես նաև սահմանամերձ շրջաններում և միջազգային հաղորդակցության ուղիներում իրավահարաբերությունները կարգավորելիս Հայաստանի Հանրապետությունը պետք է առաջնորդվի տարածքային ամբողջականության պաշտպանության, անվտանգության, ինչպես նաև սահմանային հարցերի խաղաղ լուծման սկզբունքներով:
Վերը նշվածը հիմք է տալիս՝ պնդելու, որ Հայաստանի և Ադրբեջանի միջև պետական սահմանի հստակեցման վերաբերյալ որևէ միջազգային պայմանագիր չի ստորագրվել, դելիմիտացիոն և դեմարկացիոն հանձնաժողովներ չեն ձևավորվել, ս.թ. նոյեմբերի 9-ի հայտարարությունը չի պարունակում որևէ դրույթ, որը վերաբերում է Հայաստանի և Ադրբեջանի միջև պետական սահմանների ճշգրտմանը, ինչը նշանակում է, որ ներկայումս Սյունիքի մարզում իրականացվող սահմանների հստակեցման գործընթացն ամբողջությամբ իրականացվում է առանց որևէ իրավական հիմքի ու միջազգային պայմանագրի, հետևաբար՝ ամբողջությամբ անօրինական է:
Հաշվի առնելով վերը նշվածը՝ «Արդար Հայաստան» հանրային նախաձեռնությունը ՀՀ վարչապետ Նիկոլ Փաշինյանից պահանջում է անհապաղ դադարեցնել Սյունիքի մարզում սահմանների «Ճշգրտման» ապօրինի գործընթացը, Ադրբեջանի հետ հետագա բանակցությունների արդյունքում ստեղծել դելիմիտացիոն և դեմարկացիոն հանձնաժողովներ, որոնց գործունեության արդյունքում նոր միայն հստակեցնել Հայաստանի պետական սահմանները:
«Արդար Հայաստան» հանրային նախաձեռնություն
