«Խնդիրներից մեկն այն է, որ փաշինյանական իշխանությունը «սեւ-սպիտակ», «նախկիններ-յուրայիններ» բաժանումն արեց. այլախոհություն չկա»,-«Ռուսաստանի հայերի միության» կազմակերպած առցանց քննարկման ժամանակ այսօր հայտարարեց միության նախագահ Արա Աբրահամյանը: «Եթե կես վայրկյան առաջ նա հեռանա, դա առաջին հերթին իր օգուտը կլինի, հետո՝ ողջ հայ ազգինը: Պետք չէ նրանից սպասել, որ որեւէ բան կանի: Նրա բոլոր քայլերը, որոնց հետեւում ենք, չենք արձանագրում, որ գործողությունների քարտեզ ունի: Նա ինքն էլ հասկանում է, որ իր հրապարակած ճանապարհային քարտեզում իրականում չկան ժամկետներ, պատասխանատու անձինք: Մեկ ամսից ավելի է անցել, եւ փոփոխություն չենք տեսել Արցախի եւ Հայաստանի համար»,-նշեց նա:
Անդրադառնալով հայաստանյան ընդդիմության՝ անցումային կառավարություն ստեղծելու պահանջին՝ Արա Աբրահամյանը համոզմունք հայտնեց, որ մարդիկ սպասում են ոչ թե անցումային ժամանակահատվածի, այլ խնդիրների լուծման համակարգային մոտեցումների. «Ով ուզում է վարչապետ դառնալ, պետք է ասի՝ ի՞նչ է պատրաստվում անել, ինչպե՞ս: Ես դեմ չեմ Վազգեն Մանուկյանին, բայց նա պետք է ասի, թե ինչպես է խնդիրները լուծելու՝ Արցախի հարցը, կորոնավիրուսը, փախստականների խնդիրը: Հայաստանը ծանրագույն վիճակում է: Հստակ ճանապարհային քարտեզ պետք է լինի»: Արա Աբրահամյանը նաեւ շեշտեց՝ երբ Նիկոլ Փաշինյանը նոր էր եկել իշխանության, ինքը զգուշացնում էր, որ պատերազմի դեպքում ահավոր իրավիճակ է լինելու, որովհետեւ Փաշինյանն իր կյանքում ոչ մի գործ չի արել, եւ նման անձը չի կարող երկիր ղեկավարել:
Լուիզա ՍՈՒՔԻԱՍՅԱՆ
