Ազատ ոճի ըմբշամարտի Հայաստանի ազգային հավաքականի գլխավոր մարզիչ Հաբեթնակ Կուրղինյանը եւ մարզիչ Էդգար Ենոքյանն այսօր ամփոփել են Սերբիայում կայացած աշխարհի գավաթի անհատական խաղարկությանը մեր ընտրանու մասնակցության արդյունքները:
Հայաստանի ազատ ոճայինները նվաճել են մեկական ոսկե, արծաթե եւ բրոնզե մեդալ: Վազգեն Թեւանյանը հավասարը չի ունեցել 65 կգ քաշային կարգում, 57 կգ քաշային կարգում Արսեն Հարությունյանը արժանացել է արծաթե մեդալի, իսկ Արման Անդրեասյանը 70 կգ քաշային կարգում դարձել է բրոնզե մեդալակիր:
Հաբեթնակ Կուրղինյանը նշել է, որ մասնակցությունն, ընդհանուր առմամբ, նորմալ է գնահատում՝ հաշվի առնելով, որ կորոնավիրուսի համավարակով եւ արցախյան վերջին պատերազմով պայմանավորված կանոնավոր մարզումներ եւ ուսումնամարզական հավաքներ, ըստ էության, չեն եղել: Նա նշել է նաեւ, որ չնայած հավաքականի անդամները այս մրցաշրջանում փաստացի միջազգային որեւէ մրցաշարի չեն մասնակցել, Բելգրադում ցույց տվեցին, որ ունակ են ուժեղ մրցակցություն ցույց տալ ցանկացած երկրի թիմի: Գլխավոր մարզիչը կարեւորել է նաեւ գալիք մրցաշրջանը, ինչը օլիմպիական վարկանիշային մրցաշարերի եւ հետաձգված օլիմպիական խաղերի անցկացման տարի է:
Էդգար Ենոքյանը հավելել է, որ մեր հավաքականը կարող էր մի քանի մեդալ ավելի նվաճել, սակայն նրանք վրիպումներ են թույլ տվել իրենց գոտեմարտերում, ինչը պետք է հետագայում բացառել ավելի լուրջ աշխատանքով: Մասնավորապես, նա առանձնացրել է Ռազմիկ Պապիկյանին՝ 61 կգ եւ Հրայր Ալիխանյանին՝ 74 կգ:
Կարդացեք նաև
Պարոնայք Կուրղինյանն ու Ենոքյանը նույնպես, ինչպես հունահռոմեական ոճի հավաքականի մարզիչները, նշել են, որ որոշ քաշային կարգերում, հատկապես՝ բարձր, մարզումային մրցակցի եւ ընդհանրապես մրցակցության պակաս կա Հայաստանում:
Աշոտ ՀԱԿՈԲՅԱՆ
