Այսօր Հանրապետության հրապարակում վարչապետ Նիկոլ Փաշինյանի հրաժարականի պահանջով հանրահավաքի ժամանակ ՀՀ վաստակավոր արտիստ Վիգեն Ստեփանյանն ասաց. «Ինչպես ամեն մեկիդ, հուզմունքը, ցասումը, կատաղությունը խեղդում է ինձ: Գտնվում ենք հիմա այն վիճակում, որ մի բան ենք պահանջում՝ արդարություն: Ես կյանքիս մեջ չեմ եղել որեւէ կուսակցության անդամ, չեմ հետապնդել որեւէ շահ ու չեմ սպասարկել որեւէ մեկի շահերը: Իմ շահը մեկն է՝ իմ քաղաքը՝ Երեւանը, իմ Հայաստանը եւ տեր Աստված»:
Նա դիմեց ոստիկաններին. «Տղե՛րք, դուք չե՞ք հասկանում, որ բոլոր այն հրամանները, որ դուք ստանում եք, հատուկ են արված, որ ծնեն ատելություն ժողովրդի մեջ ձեր նկատմամբ: Ժողովուրդը համբերատար է, կների, կսպասի, բայց մի խանգարեք մեր երկրի այն արդար ընթացքին, որոնք հետապնդում ենք բոլորս: Մենք ուզում ենք միայն վերադարձնել Հայաստան աշխարհին հավատ դեպի հայրենիք ու դեպի Աստված: Ոչ մեկս աթոռ չի հետապնդում, ոչ մեկս շահ չի հետապնդում: Մենք ուզում ենք շտկվենք, այդ խայտառակ համաձայնությունից հետո աչքերս վեր անենք եւ հպարտ հայացքով, չնայած հպարտ խոսքը վարկաբեկել են, նայենք ապագային՝ հանուն մեր երեխաների, մեր թոռների: Մեզ ուրիշ ոչինչ հարկավոր չէ: Հարգելի՛ ոստիկաններ, հասկացե՛ք, ձեզ հատուկ են հրահրում ժողովրդի դեմ»:
Նա վստահեցրեց, որ եթե ամեն մեկս մեր տեղում մեր փափուկ բազմոցներին նստենք, հեռուստացույց նայենք ու այս ցուրտ եղանակին հրապարակ չգնանք, ոչինչ չի ստացվի:
Հռիփսիմե ՋԵԲԵՋՅԱՆ
