«Ես միանշանակորեն չեմ կարող ասել, թե որքան է հիմնավոր Ալիևի հայտարարությունը 50 միլիարդ դոլարի մասով»,- իր ամփոփիչ մամուլի ասուլիսի ընթացքում, անդրադառնալով Ադրբեջանի նախագահ Իլհամ Ալիևի հայտարարությանը, ասաց Արցախի մարդու իրավունքների պաշտպան Արտակ Բեգլարյանը։
Նա նկատեց, որ տարիներ շարունակ Ադրբեջանը միջազգային փորձագետներ էր հրավիրել, որոնք տարբեր հետազոտություններ և հաշվարկներ են կատարել․ «Ակնհայտորեն, իրենք փաթեթներ պատրաստել են։ Չեմ կարող ֆինանսական առումով գնահատել, թե ինչ վնասի մասին է խոսքը, բայց մյուս կողմից ակնհայտ է, որ սա գլխավորապես կիրառվում է քարոզչական նպատակներով, քարոզչական թեզ է։ Եվ մեր հասարակության, մեր որոշում կայացնողների վրա հոգեբանորեն ճնշում գործադրելու համար է, միգուցե նաև քաղաքական բանակցություններում փոխզիջումների շեմը բարձրացնելու համար է, որպեսզի հնարավոր լինի լրացուցիչ թեմա գտնել և բանակցություններում որպես խաղաքարտ օգտագործել»։
Արտակ Բեգլարյանը ընդգծեց, որ ակնհայտ է, որ պատերազմական գործողությունների ընթացքում պետք է նյութական վնասներ լինեին։ Եվ այդ վնասները երկկողմանի են․ «Հարյուր հազարավոր քաղաքացիներ՝ Ադրբեջանի բնակիչ հայեր, ադրբեջանահայեր իրենց տները լքել են առանց որևէ բան տեղափոխելու այստեղ՝ որևէ հնարավորություն չունենալով, ուղղակի մազապուրծ փախել են, դա էլ է ակնհայտ։ Այսինքն՝ եթե Ադրբեջանը խոսում է վնասների մասին, պետք է խոսի երկկողմանի վնասների մասին։ Իհարկե՛, այստեղ հայկական իշխանությունները և՛ Հայաստանի Հանրապետությունում, և՛ Արցախի Հանրապետությունում մեծ անելիքներ ունեն՝ շատ լուրջ փաստարկելու, փաթեթավորելու այդ վնասները՝ և՛ 90-ականներին, և՛ հիմա։ Եվ սա պետք է կիրառել բանակցություններում, որովհետև մարդիկ և պետությունը շատ լուրջ վնասներ են կրել»։
Կարդացեք նաև
Ամի ՉԻՉԱԿՅԱՆ
