«Երեկ տեսա ոստիկանության հաղորդագրությունը: Բոլորին զգուշացնեմ, այդ թվում ոստիկանությանն ու դատախազությանը: Այն, ինչ իրենք ներկայացրել են իբրեւ թե քրեական օրենսգրքով նախատեսված՝ 301.1 հոդվածի մոտեցում, իրավական տգիտություն է, անգրագիտություն, քաղաքական հետապնդման փորձ»,-Հանրապետության հրապարակում վարչապետ Նիկոլ Փաշինյանի հրաժարականի պահանջով նստացույցի ժամանակ լրագրողների հետ ճեպազրույցում այսօր ասաց ՀՅԴ գերագույն մարմնի անդամ, ԱԺ նախկին պատգամավոր Արծվիկ Մինասյանը:
Հիշեցնենք, որ երեկվա հանրահավաքում «Իմ քայլը» խմբակցության հասցեին հնչած հայտարարությունների առիթով ՀՀ ոստիկանությունը տարածել է հաղորդագրություն՝ նշելով, որ հավաքի մասնակիցների հայտարարություններում նշված գործողությունների իրականացումը առերևույթ կարող է պարունակել ՀՀ քրեական օրենսգրքի 301.1-րդ հոդվածով նախատեսված հանցակազմի հատկանիշներ:
Արծվիկ Մինասյանը դիմեց ոստիկանությանը. «Չփորձեք քրեական օրենսգիրքը մանիպուլյացիաներով վերագրել համաժողովրդական շարժման պահանջների իրականացմանը: Ավելին՝ շարժումը մշտապես ասել է, որ առաջնորդվում է օրինականությամբ»:
Արծվիկ Մինասյանի խոսքով. «Պատասխանը լինելու է հուժկու եւ օրինական»:
Կարդացեք նաև
Ըստ Մինասյանի՝ իշխանական պատգամավորները ոստիկանության նշյալ հաղորդագրությունն իրենց սոցցանցային էջերում ուղղորդված են տարածում. «Նրանց խորհուրդ կտամ՝ ամոթ է, տարրական իրավական գիտելիքի տիրապետեք եւ կարդացեք այդ հոդվածը: Դրանում ամրագրված է պետական ինստիտուտ հանդիսացող՝ նախագահի, կառավարության, ազգային ժողովի եւ ՍԴ-ի հանդեպ բռնությունը, բռնության սպառնալիքի գործադրմամբ որոշակի գործողություններ կամ անգործություն պարտադրելը: Պատգամավորները պետք է հասկանան, որ իրենք ոչ ԱԺ են, ոչ էլ այդ ինստիտուտներից որեւէ մեկը: ԱԺ-ն ԱԺ է՝ որպես պետական ինստիտուտ: Եթե պատգամավորի նկատմամբ հանրային պահանջ եւ ճնշում է ներկայացվում առանց բռնության սպառնալիքի, դա ընտրողների պահանջն է, որը պետք է իրացվի: Պատգամավորն իրավունք չունի իրեն վերագրել ողջ ԱԺ-ի գործառույթը»:
Լուիզա ՍՈՒՔԻԱՍՅԱՆ
