Երեւանի ավագանու այսօրվա նիստում ավագանու «Իմ քայլը» խմբակցության անդամ Արթուր Իսպիրյանը հետաքրքրվեց՝ նախորդ տարվա բյուջեով Հրազդանի կիրճը մաքրելու համար գումար էր նախատեսված, հաջորդ տարվա բյուջեով թիվն ավելացե՞լ է: «Բացի այդ, Երեւանյան լիճն է կեղտոտ»,-նշեց Իսպիրյանը:
Երեւանի փոխքաղաքապետ Հրաչյա Սարգսյանը պատասխանեց. «Գետառի մաքրման աշխատանքները պարբերաբար արվում են: Աղբը պարբերաբար լցվում է Գետառ եւ խցանումներ առաջացնում: Երեւանյան լճի եւ Հրազդան գետի երկայնքով նախատեսում ենք ունենալ մեծաքանակ եղեգների կարճեցման գործընթաց: Այս տարի աշխատել ենք, որ հետազոտություններ լինեն եւ մոտ հինգ միլիոն դրամի գումար կա նախատեսված՝ թունաքիմիկատներ ձեռքբերելու համար»:
Փոխքաղաքապետի խոսքով. «Դրա շնորհիվ եղեգի չորացման աշխատանք կարվի վաղ գարնանը: Եթե հաջորդ տարի Երեւանյան լճի եւ Հրազդան երկայնքով եղեգն ամբողջությամբ հեռացվի, ապա մյուս տարի կդիմենք կառավարությանը, որ մեզ տրամադրեն մոտ երեք տարի չօգտագործված բնապահպանական վճարը՝ 90 միլիոն դրամի շրջանակում: Աղբը կհեռացվի, որպեսզի ստեղծվի համապատասխան միջավայր: Ծրագիրը բարդ է, բայց հաջորդ տարի առաջին քայլերը կարվեն»:
Կարդացեք նաև
Արթուր Իսպիրյանը համոզմունք հայտնեց, որ Հրազդանի կիրճում ստեղծված իրավիճակում մեղավոր են նաեւ ռեստորանները. «Նրանք էլ պետք է մաքրման աշխատանքներին մասնակցեն գումարային առումով»:
Քաղաքապետ Հայկ Մարությանին միտքը դուր եկավ. «Չգիտեմ, թե ինչ իրավական լծակներ կան դրա համար, բայց մարդկային շփման մակարդակում կկարողանանք տնտեսվարողներին բերել այդ դաշտ»:
Լուիզա ՍՈՒՔԻԱՍՅԱՆ
