Լեռնային Ղարաբաղի իշխանություններն օգնության խնդրանքով դիմել են Մոսկվային: Այս մասին «ՌԻԱ Նովոստիին» ասել է Արցախի պետնախարար Գրիգորի Մարտիրոսյանը:
Մարտիրոսյանը նշել է, որ պատերազմի հետևանքով մոտ 35-45 հազար մարդ զրկվել է տանիքից: Այդ թվի մեջ ներառված են նրանք, որոնց տներն ավերվել են հրթիռակոծությունից, ինչպես նաև նրանք, որոնց տներն անցել են Ադրբեջանի վերահսկողության տակ:
«Այդ մարդկանց մեծ մասն այժմ գտնվում է Հայաստանում: Իհարկե, նրանց վերադարձնելու համար մենք պետք է նրանց ապահովենք գոնե նվազագույն կենսական, կենցաղային պայմաններով: Դա կառավարության առաջնահերթ խնդիրն է: Նրանք, ովքեր վերադառնում են, մենք արագ կերպով ժամանակավոր կացարաններ ենք տրամադրում: Գործարկում ենք և՛ կողմնակի ֆոնդեր, և հյուրանոցներ, և՛ հանրային նշանակության շենքեր»,- ասել է Մարտիրոսյանը:
Նրա խոսքով՝ ԼՂ իշխանությունները նաև օգնության խնդրանքով դիմել են Ռուսաստանի կառավարությանը: «Այս պահի դրությամբ այդ հարցը քննարկվում է: Օգնության մի մասն արդեն ցուցաբերվել է. դա շինանյութն է, առաջին անհրաժեշտության իրեր, ինչպես օրինակ ծածկոցներ և այլն»,- ասել է Մարտիրոսյանը:
Կարդացեք նաև
Պատրաստեց՝ Վիկտորյա ԱՆԴՐԵԱՍՅԱՆԸ
