«2021թ.-ի պարգեւավճարների ֆոնդը նախատեսված է մեկ միլիարդ 23 միլիոն դրամի չափով: Շեշտեմ, որ նախորդ տարվանից այն շուրջ 49%-ով պակաս է»,-Երեւանի ավագանու այսօրվա նիստում Երեւան քաղաքի 2021թ.-ի բյուջեն հաստատելու մասին նախագիծը զեկուցելու ընթացքում հայտարարեց փոխքաղաքապետ Սերգեյ Ներսիսյանը՝ պատասխանելով ավագանու «Իմ քայլը» խմբակցության անդամ Տիգրան Գալստյանի հարցին, թե որքան է կազմում եկող տարվա բյուջեում պարգեւավճարների չափը:
Տիգրան Գալստյանն ասաց. «Աշխատավարձի տեղը պարգեւավճար տալու ձեւաչափին կտրականապես դեմ եմ: Դրա համար մեզ շարունակ մամուլով քննադատում են: Մենք էլ անընդհատ բացատրում ենք, որ դա իրականում աշխատավարձ է: Կարծում եմ՝ պետք է քաղաքական կամք դրսեւորենք եւ աշխատավարձերը բարձրացնենք՝ 30, 50 եւ 100%-ի չափով: Դա իմ առաջարկն է: Պարգեւավճար տալիս են հավելյալ աշխատանքի համար, այլ ոչ թե որպես աշխատավարձ: Ինչո՞ւ մենք պարգեւավճարն աշխատավարձի տեսքով չենք տալիս»:
Փոխքաղաքապետը պատասխանեց. «Մեր սկզբունքը հետեւյալն է: Ներկայումս կան հաստիքային աշխատավարձեր՝ մարդիկ, որոնք պայմանագիր են կնքել եւ անցել աշխատանքի, ունեն ֆիքսված գումար: Բացի դրանից, նաեւ պարգեւավճարներ են ստացել: Այս պահին չենք կարող մեր կամքով մարդկանց համար դա որպես աշխատավարձ դիտարկել՝ հանել պարգեւավճարի ֆոնդն ու դնել աշխատավարձի ֆոնդի մեջ: Դրա համար պետք է աշխատավարձերի հետ կապված նախագիծ մշակվի: Պատրաստ ենք համագործակցել ավագանիների հետ եւ նախագիծը դնել քննարկման: Այո, բոլոր աշխատակիցների համար աշխատավարձի բարձրացումը կարեւոր խնդիր է: Բոլորը տեղյակ են, որ պետական համակարգում ամենացածր հաստիքային աշխատավարձերը քաղաքապետարանում են, բայց վստահեցնում եմ, որ քաղաքապետարանը բոլորից շատ աշխատողներից է»:
Տիգրան Գալստյանը նկատեց. «Կարծում եմ՝ հարցը շատ հրատապ է: Մինչեւ փետրվար ես համատեղ նախագիծ կմշակեմ, որպեսզի աշխատավարձի բարձրացումը լինի պարտադիր: Կարծում եմ՝ քաղաքապետարանի բոլոր աշխատակիցները դրան սպասում են: Ավելի ճիշտ գործելաոճ է պարգեւավճարի փոխարեն աշխատավարձը բարձրացնելը»:
Կարդացեք նաև
Լուիզա ՍՈՒՔԻԱՍՅԱՆ
