Էներգետիկ անվտանգության ինստիտուտի ղեկավար, էներգետիկ անվտանգության փորձագետ, քաղաքական գիտությունների դոկտոր Վահե Դավթյանը դեռ դեկտեմբերի 18-ից օրեր առաջ էր գրառում արել՝ համոզմունքով կանխատեսելով, որ էլէներգիան կթանկանա:
«Ինչի՞ հիմամբ էր Ձեր համոզմունքը՝ զուտ քաղաքակա՞ն, տնտեսակա՞ն, թե՞ էներգահամակարգում վարկային ահռելի բեռի գործոնով պայմանավորված».- «ՀՀ»-ի հարցին ի պատասխան փորձագետը նշեց. «Մի քանի գործոններ կառանձնացնեմ: Առաջինն այն է, որ երկրի էներգետիկ համակարգում կուտակվել է հսկայական վարկային բեռ: Մենք տարիներ շարունակ եւ առ այսօր շարունակում ենք միլիոնավոր դոլարներ ներգրավել երկրի էներգետիկ համակարգի արդիականացման եւ նոր ենթակառուցվածքային նախագծեր իրականացնելու համար: Ունենալով ներսում սպառման բավականին համեստ դինամիկա, միաժամանակ, ըստ էության, ձախողելով արտահանման ռազմավարությունը, չենք կարողանում ապահովել Հայաստանի էներգահամակարգի բարձր ՕԳԳ-ն: Մեր էներգահամակարգը ավելցուկային է իր հզորություններով եւ խարսխված է կայուն արտահանման սկզբունքի վրա: Այլ կերպ՝ ինչքան ավելի շատ ենք արտահանում էլէներգիա, այնքան ավելի մեծ է հնարավորությունը երկրի ներսում արդյունավետ էներգետիկ քաղաքականություն իրականացնելու եւ, ի վերջո, ցածր սոցիալակենտրոն սակագներ ապահովելու համար: Բայց ինչ ենք տեսնում. կորցրել ենք Վրաստանի էլեկտրաէներգետիկ շուկան, եւ գրեթե էլէներգիա չենք արտահանում այդ ուղղությամբ: Որոշակի խնդիրներ են ձեւավորվում նաեւ, արդեն պայմանավորված աշխարհաքաղաքական վերադասավորումներով, իրանական ուղղությամբ, որտեղ ակտիվացել են Ադրբեջանը եւ Թուրքմենստանը: Այլ գործոններ էլ կան՝ գումարած կառավարման գործոնը… Եվ երբ դրանք ի մի ենք բերում, տեսնում ենք, որ էլէներգիայի թանկացումը առավել քան սպասելի էր:
Արմենուհի ՄԵԼՔՈՆՅԱՆ
Նյութն ամբողջությամբ՝«Հայաստանի Հանրապետություն» օրաթերթի այսօրվա համարում:
