«Հայրենիքի փրկության շարժման» ներկայացուցիչ, ՀՅԴ անդամ Գեղամ Մանուկյանը «Հանրապետության» հրապարակում անհնազանդության ակցիայի ժամանակ դիմեց կառավարության սենյակներում աշխատող համաքաղաքացիներին, որոնցից շատերը անցած 2,5 տարվա անձնական շփումներում բողոքել, ընդվզել են, որ ունեն անգրագետ նախարարներ, երիտասարդ փոխնախարարներ, որոնք գործը չեն հասկանում եւ ամբողջ բեռը իրենց ուսերին է:
«Սակայն մեծ մասդ հանդուրժել եք դա եւ ձեր հանդուրժելու պատճառով փլվել է ՀՀ պետական կառավարման համակարգը: Այդ համակարգի փլուզումն էր նաեւ պատճառը, որ մենք պարտվել ենք պատերազմում: Դիմում եմ այս ամբիոնից բոլորիդ: Մասնագետներ, առաջատար մասնագետներ, բաժնի պետեր, վարչության պետեր, ձեր ժամանակը սպառվում է: Կամ դուք ըմբոստանում եք, ընդվզում եք ու ասում եք այլեւս անգրագետների տիրապետության տակ ստրուկ չեք, կամ մասնակիցն եք դառնում այն մեծ դավաճանությանը, որի գլխին կանգնած է վարչապետի աթոռը գրկած Նիկոլ Փաշինյանը: Հայրենիքը ծախվեց նաեւ ձեր լռության պատճառով: Մի շարունակեք լռել, որ ի վերջո հայրենիքի մեջքը հնարավոր լինի ուղղել: Դրա համար այսօր շրջափակումը դադարեցնում ենք: Բայց դադարեցնում ենք ժամանակավոր: Նորից ենք դիմում բոլորիդ: Ուշքի եկեք՝ պետական համակարգի աշխատողներ: Պարգեւավճարները սպառվում են: Այս անուղեղ, ապաշնորհ կառավարությունը վաղը փող չի ունենալու՝ թոշակ տա, պարգեւավճարը կմոռանաք վերջնականապես»,- հայտարարեց Գեղամ Մանուկյանը:
Աշոտ ՀԱԿՈԲՅԱՆ
