«Ամենից հեշտ տարբերակը բոլոր մեղքերը նախկինների վրա բարդելն է: Բայց երկուսուկես տարի իշխանությունն անմիջական պատասխանատվություն էր կրում երկրի անվտանգության համար: Խայտառակ կապիտուլյացիան հենց իշխանության պատասխանատվության ներքո է»,-վարչապետ Նիկոլ Փաշինյանի հրաժարականի, ռազմական դրությունը վերացնելու եւ «Իմ քայլի»՝ մասնագիտությամբ իրավաբան պատգամավորների՝ խմբակցությունից դուրս գալու պահանջներով փաստաբանների բողոքի երթի ժամանակ այսօր լրագրողների հետ զրույցում ասաց իրավապաշտպան, ԱԺ նախկին պատգամավոր Էլինար Վարդանյանը:
«Որքան էլ փորձեն իրենց գործողություններն արդարացնել նախկինների սխալներով…որեւէ մեկը չի հերքում, որ նախկինում սխալներ եղել են, բայց երկուսուկես տարի իշխանությունը Հայաստանը հետեւողականորեն տարավ պատերազմի, բացեց Հայաստանը դրա առաջ: Ուստի այսօրվա պատասխանատուներն են մեղավոր»,-համոզմունք հայտնեց նա:
Անդրադառնալով Նիկոլ Փաշինյանի հայտարարությանը, թե Սյունիքի հատվածում Հայաստանի եւ Ադրբեջանի սահմանները հիմա ճշգրտվում են նախկինների օրոք՝ 2010թ. ընդունված օրենքով, որում Սյունիքի սահմանից այն կողմ ոչ թե Արցախի հանրապետության տարածքներն են, այլ Ադրբեջանի, Էլինար Վարդանյանը նկատեց. «Շատ լավ կլիներ, որ վարչապետը վարչատարածքային սահմանները տարբերեր պետական սահմաններից: Այո, այդ օրենքում կան ձեւակերպումներ, որոնք պայմանավորված էին Արցախի անկախությունը դեռեւս ճանաչած չլինելու հանգամանքով, բայց, կարծում եմ՝ վարչատարածքային սահմաններին որպես պետական սահմանի հղում անելը Փաշինյանի հերթական մանիպուլյացիան էր»:
Կարդացեք նաև
Լուիզա ՍՈՒՔԻԱՍՅԱՆ
