Սիսիանի եկեղեցու հոգեւոր հովիվ Տեր Պարգեւ քահանա Զեյնալյանի նկատմամբ՝ բռնությամբ գործադրված կրոնական թշնամանք հարուցելու եւ մի խումբ անձանց կողմից նախնական համաձայնությամբ, կրոնով պայմանավորված բռնության հրապարակային կոչեր հնչեցնելու վերաբերյալ փաստաբան Վահան Հովհաննիսյանը ՀՀ քրեական օրենսգրքի երկու հոդվածներով հաղորդում է ներկայացրել ՀՀ գլխավոր դատախազություն։
Առաջինը նշվում է ՀՀ քրօրենսգրի 226 հոդվածը («Ազգային, ռասայական կամ կրոնական թշնամանք հարուցելը»)։ «Ուսումնասիրելով ֆեյսբուքյան օգտատեր Արսեն Ավագյանի գրառումներն ու իր կողմից տեղադրված տեսանյութը՝ գտնում եմ, որ առկա են կրոնական թշնամանք հարուցելուն ուղղված գործողությունները, որը հրապարակային է, եւ առկա է նաեւ բռնության սպառնալիք»,–Aravot.am-ի հետ հեռախոսազրույցում ասաց փաստաբան Վահան Հովհաննիսյանը։։
Ըստ փաստաբանի՝ Արսեն Ավագյանը հանդիսանում է պաշտոնատար անձ։ Երթի տրամաբանությունից պարզվում է, որ հենց նա է կազմակերպել երթը, միանշանակ կրոնական թշնամանք հարուցելուն ուղղված գործողություններ անելով, որոնք զուգորդված են բռնություն կատարելու սպառնալիքով ու դա արվում է հրապարակային։ «Երթի տրամաբանությունից անկողմնակալ դիտորդը հասկանում է, որ դա կազմակերպված ակցիա է եկեղեցու դեմ»,–ասաց նա։
Վահան Հովհաննիսյանը նշեց նաեւ, որ հանցագործության մասին հաղորդման մեջ վկայակոչել է ՀՀ քրօրենսգրքի 226.2 հոդվածը՝ «Բռնութուն գործադրելու հրապարակային կոչերը»։ «Բնականաբար այս երկու հոդվածի հանցակազմերը հակասում են իրար, սակայն առավելագույնի սկզբունքով նշել եմ երկու հոդված, որպեսզի վարույթն իրականացնող մարմինը քննության արդյունքում պարզի, թե որ հոդվածի հանցակազմը կա Արսեն Ավագյանի գործողություններում»,–ասաց Վահան Հովհաննիսյանը։
Կարդացեք նաև
Հիշեցնենք, որ երկուշաբթի՝ դեկտեմբերի 21-ին, վարչապետ Նիկոլ Փաշինյանին Սիսիանի հոգեւոր հովիվը հրաժարվել է ձեռքով բարեւել։ Սիսիանցիները որոշել են հաշվեհարդար տեսնել քահանայի հետ։
Արմեն ԴԱՎԹՅԱՆ
