Լեռնային Ղարաբաղում ավարտվել է ռուս խաղաղապահների համար նախատեսված բլոկ-մոդուլային քաղաքի շինարարությունը, որը գտնվում է Ստեփանակերտում: Այս մասին հայտնում է Ռուսաստանի Դաշնության պաշտպանության նախարարությունը: Այն նախատեսված է 250 հոգանոց ռուսական խաղաղապահ զորակազմի զինծառայողների տեղակայման համար:
Ներկայումս ընթանում են ինժեներական սարքավորումների շահագործման մեկնարկի աշխատանքները, որոնք, ըստ նույն աղբյուրի, շուտով կավարտվեն: Բլոկ-մոդուլային քաղաքում կան բնակելի մոդուլներ, մարզասրահ, բուժկետ, ժամանցի սենյակ, շտաբ եւ գրասենյակ, զենքի եւ ինժեներական սարքավորումների պահպանման սենյակ, ճաշարան, խոհանոց, սննդի պահեստ, սանիտարական մոդուլներ։
ՌԴ ՊՆ-ն նաեւ հայտնում է, որ Միջազգային հակաականային կենտրոնի մասնագետները շարունակում են Լեռնային Ղարաբաղի տարածքի ականազերծման աշխատանքները: Ռուս խաղաղապահ ուժերի ինժեներական ստորաբաժանումներն արդեն ականազերծել են շուրջ 238 հեկտար տարածք, 93 կիլոմետր ճանապարհ, 423 բնակելի տուն: Հայտնաբերվել եւ վնասազերծվել է ավելի քան 8,3 հազար պայթուցիկ նյութ։
Ըստ ՌԴ ՊՆ-ի` ԼՂ-ում պայթունավտանգ առարկաներից տարածքի ականազերծման եւ մաքրման ընթացքում ռուս խաղաղապահները կիրառում են ժամանակակից ռոբոտատեխնիկական համալիրներ, որոնք լեռնային տեղանքի եւ եղանակի վատթարացման պայմաններում թույլ են տալիս պահպանել ականազերծման բարձր տեմպը: Ըստ հաղորդագրության, հայտնաբերված պայթյունավտանգ առարկաները եւ չաշխատող զինամթերքը ոչնչացվում են:
Կարդացեք նաև
Լուսինե ԲՈՒԴԱՂՅԱՆ
