«Այո, չորս ամիս առաջ հնարավոր էր դադարեցնել պատերազմը: Անհնարին ոչինչ չկա, բայց ոչ մի բան չձեռնարկեցին, այլ մտածված տարան այդ ձախողմանը, պատերազմին, կորուստներին: Ես ասել եմ, որ իրենք չեն տիրապետում, ի վիճակի չեն կազմակերպելու, իրենց անցած ճանապարհը, փորձը… բոլորը ձախողել են»,- այսօր Ազատություն հրապարակում «Հայրենիքի փրկության շարժման» հանրահավաքի ժամանակ ունեցած ելույթում ասաց ԲՀԿ առաջնորդ Գագիկ Ծառուկյանը:
Իր փոխանցմամբ, սպասվող խնդիրների մասին դեռ 7 ամիս առաջ տեղեկացրել է իշխանություններին, սակայն ոչ մի քայլ չի կատարվել: Ավելին, նա կարծում է, որ իշխանությունը 2,5 տարի ստել է:
ԲՀԿ առաջնորդը խոսեց իր նկատմամբ իրականացված քաղաքական հետապնդումների մասին` հավելելով, որ դրանց նպատակն իրեն լռեցնելն էր. «Ինձ ձերբակալեցին: Ես այդ օրն էլ հայտարարեցի, որ ինձ ձերբակալելով երկրի խնդիրները չես լուծելու, ժողովրդի վիճակը չես բարելավելու, համաճարակը չես բուժելու, Արցախի խնդիրը չես լուծելու: Եվ նրանք մտածված տարան այսպիսի կորստի»:
Այսօրվա վիճակն էլ, ըստ նրա, նույնն է, եւ եթե այս իշխանությունը մնա, Հայաստանը նույն ճակատագրին է արժանանալու. «Ամեն ինչ մեռած է, քանդված է, տնտեսություն, կառավարություն չկա, մարդիկ անտեր են: Այսօր ամբողջ Սյունիքն ուզում է դատարկվի, գյուղերն անտեր թողնեն: Զոհված զինվորների, անհետ կորածների ծնողներին խաբում են, ժամանակ են ձգում, որ կարողանան սառեցնել իրավիճակը, բայց չեն հասկանում, որ արյունը չի սառում, չի մոռացվում, արյունը ջուր չի դառնում: Այս բոլորի մեղավորը իրենք են, վարչապետը, որը պետք է ժամ առաջ հրաժարական տա»:
Կարդացեք նաև
Նելլի ԳՐԻԳՈՐՅԱՆ
