ԱԺ «Լուսավոր Հայաստան» խմբակցության պատգամավորները այցելել են Սյունիքի մարզում պատերազմից հետո սահմանամերձ դարձած համայնքներ: Ըստ տարածված լուրերի, Գորիսում դեպի Կապան միջպետական ճանապարհը փակած քաղաքացիներին հանդիպելուց հետո նրանք Կապան գնացել են այլընտրանքային ճանապարհով։
ԱԺ «Լուսավոր Հայաստան» խմբակցության պատգամավոր Գեւորգ Գորգիսյանը հեռախոսով Aravot.am-ին ասաց. «Մեր նպատակը տեղում խնդիրների խորությունը, մանրամասները հասկանալն է: Գորիսում մարդիկ ցույց էին անում՝ բողոքում էին կառավարության անգործությունից: Հետո այցելեցինք Կապան, հանդիպեցինք քաղաքապետի հետ: Ծանոթացանք սահմանազատման պրոցեսներին եւ խնդիրը առաջիկայում կպահենք մեր ուշադրության կենտրոնում: Վաղը այցելելու ենք Գորիսի շրջակա գյուղեր, որոնք եւս դարձել են սահմանամերձ եւ նմանատիպ խնդիրների առջեւ են հայտնվել»:
Հարցին, թե սահմանազատման գործընթացում որո՞նք են ամենախնդրահարույց երեւույթները, պարոն Գորգիսյանը պատասխանեց. «Ամենակարեւորը երեւի թե այն է, որ ոչ ոքի նախապես ոչինչ չի զգուշացվել, եւ մարդիկ հանկարծ հասկանում են, որ մի քանի օրում սահմանը պիտի փոխվի եւ պիտի անցնի այն տարածքներով, որտեղ իրենք ապրում էին, իրենց կենդանուն էին արածացնում, ցորեն էին ցանում: Եվ որ այդ տարածքներն այլեւս թշնամու տարածքում են մնում: Սա հերթական անգամ խոսում է այն մասին, որ կառավարությունը չունի ժողովրդի հետ խոսելու որեւէ ձեւ, ժողովրդի հետ առնչվելիս՝ որեւէ ազնվություն, եւ այլեւս դադարել է լինել վստահելի»:
Կարդացեք նաև
Հետաքրքրվեցինք, թե ինչպե՞ս են վերաբերվում սեփական ուժերով ինքնապաշտպանություն կազմակերպելու՝ սյունեցիների կոչերին: «Ճիշտն ասած, այդ կոչերը չեմ լսել: Հասկանում եք, այսօր ամբողջ օրը ճանապարհներին ենք եղել: Բայց վստահ չեմ, որ դա հիմա կարող է աշխատել, որովհետեւ կանոնավոր բանակի դեմ կարող է կռվել կանոնավոր բանակը: Հիմա ամեն ինչ պետք է արվի, որ նոր սահմանամերձ դարձած համայնքներում քաղաքացիների անվտանգությունը ապահովվի»,-պատասխանեց Գեւորգ Գորգիսյանը:
Աշոտ ՀԱԿՈԲՅԱՆ
