Ինչ իրավիճակ է Կապանում եւ ինչ զարգացումներ կան, անվտանգության խորհրդի քարտուղար Արմեն Գրիգորյանը տեղեկություն չունի։ Այսօր նա խորհրդարանում «Իմ քայլը» խմբակցության անդամների հետ հանդիպման է։ Մինչ հանդիպումը լրագրողները հետաքրրքվեցին Սյունիքում տիրող իրավիճակից, սակայն պարոն Գրիգորյանն ասաց, որ այդ մասին ՊՆ տեղեկատվություն կտրամադրի․ «Քանի որ ես հանդիպման եմ, այս պահին վերջին տեղեկատվություն չունեմ՝ ինչ է փոխվել, ինչ իրավիճակ է»։
Պարոն Գրիգորյանը հիշեցրեց, որ պաշտպանության նախարարը երեկ հայտարարել է, որ ՀՀ տարածքից որեւէ զիջում չի լինելու․ «Եվ բանակցություններ են ընթանում, որպեսզի այդ դեմարկացիան լինի»։
Հիշեցնենք, այսօր Կապանի որոշ դիրքեր, որոնք ՀՀ-ի անվտանգության համար բավականին շահեկան են, պետք է հանձնել ադրբեջանական կողմին։ Սա հանրության եւ հատկապես սյունեցիների շրջանում դժգոհության մեծ ալիք է բարձրացրել, քանի որ այդ դիրքերի նշանառության տակ են հայտնվելու մի շարք գյուղեր։
Անդրադառնալով սահմանազատման եւ Սյունիքի անվտանգության թուլացման մասին հարցին, Արմեն Գրիգորյանն ասաց․ «Այս նոր միջավայրը մեզ համար ահագին խնդիրներ է ստեղծել, բայց մենք պետք է հասկանանք, որ սահմանազատում է կատարվում, եւ այն կատարվում է որոշակի փաստաթղթային հիմքերի վրա, ըստ փաստաթղթի է իրականացվում սահմանազատումը»։
Կարդացեք նաև
Հարցին՝ սպասելի՞ էր, որ սեպտեմբերի 27-ին Ադրբեջանը հարձակվելու է Արցախի վրա, պարոն Գրիգորյանը պատասխանեց․ «Պատերազմի գնահատական եղել է, բայց տեղի եւ ժամի մասով գնահատական չի եղել»։
