«Եռակողմ հայտարարությունը պատերազմը կանգնեցնելու, հրադադարի մասին է: Այն անգամ փաստաթուղթ էլ չի, որովհետեւ Արցախի կարգավիճակի մասին խոսք չունի: Ակնկալել, որ այն կրակի դադարեցում կենթադրի կամ հակամարտության լուծում` դժվար է»,-«Հոդված 3» մամուլի ակումբի առցանց քննարկման ժամանակ այսօր հայտարարեց քաղաքագետ Ալեքսանդր Իսկանդարյանը՝ անդրադառնալով այն փաստին, որ Արցախի հարցով եռակողմ հայտարարության ստորագրումից հետո Ադրբեջանը շարունակում է խախտել դրա կետերը եւ տարածքային հավակնություններ ներկայացնել ոչ միայն Արցախին, այլեւ ՀՀ-ին:
Քաղաքագետի բնորոշմամբ՝ Ադրբեջանը պատերազմի ելքից հետո ցանկություն չունի որեւէ զիջման գնալու, ինչպես եւ չուներ մինչեւ պատերազմը. «Ի՞նչ է փոխվել: Տարածքները Ադրբեջանը համարում է իրենը: Նրա նպատակն է՝ ճնշում գործադրել, դիվերսիաներ, հարձակումներ, գերեվարում իրականացնել: Այս ամենն արվում է, որպեսզի ճնշեն Արցախին: Սա եղել է եւ նախկինում, եւ հիմա էլ կլինի: Իսկ ՀՀ-ում Ադրբեջանը սահմանը դնում է այնտեղ, որտեղ ուզում է, որովհետեւ հիմքը նույնն է՝ Արցախի չլուծված հարցն Ադրբեջանի տեսանկյունից: Նրանք չեն ուզում խաղաղություն, կարգավորում: Որպեսզի անեն իրենց ուզածը, ինչ-որ կերպով գրգռելու են հայկական կողմին, պայմաններ ստեղծելու, որ Արցախում հնարավոր չլինի ապրել»:
Լուիզա ՍՈՒՔԻԱՍՅԱՆ
