Դեկտեմբերի 18-ին առավոտից գորիսեցիները փակել են Իրան-Մեղրի-Կապան-Գորիս-Երեւան տանող միջպետական ճանապարհի Որոտան գյուղով անցնող հատվածը։ Ըստ լուրերի, Սյունիքի մարզի Շուռնուխ գյուղի մի հատվածը հատկացվելու է Ադրբեջանին։
Ըստ բողոքավորների, իրենք ի վիճակի են ապահովելու մարզի սահմանամերձ համայնքների անվտանգությունը։ «Այսօր նորից մեզ ասացին, որ անվտանգության գոտուց պիտի հեռանանք, հիմա պատասխան ենք պահանջում դավաճանից։ Մեզ երաշխիքներ են պետք»,–ասում են ցուցարարները։
Նրանք պահանջում են նաեւ վարչապետի եւ կառավարության հրաժարականը։
«Առանց կրակոցի պիտի լուծվի էս հարցը։ Մենք զոհեր չենք ուզում»,–ասում են գորիսեցիները։
Կարդացեք նաև
Բողոքավորները պահանջում են հանդիպում պատասխանատու պաշտոնյաների հետ։ Նրանք վճռական են՝ չբացել միջպետական ճանապարհը մինչեւ հարցի վերջնական լուծում։
«Ուր են Սյունիքի մեր պատգամավորները, թող գան գոնե իրանք ասեն, ինչ է կատարվում։ 7 մլն դոլար դուրս գրեց ԱՅՈ-ի հանրաքվեի համար։ Բա հիմա խի չէր անում, թող հանրաքվեի դներ հարցը»,–նշում են բողոքավորները։
Հիշեցնենք, որ երեկ էլ կապանցիներն էին փակել միջպետական ճանապարհը՝ նույն պահանջով։
Արմեն ԴԱՎԹՅԱՆ
Լուսանկարները «Սյունյաց երկիր» թերթի
