ԵՄ արտաքին և անվտանգության քաղաքականության հարցերով բարձր ներկայացուցիչ Ջոզեպ Բորելը փորձել է եռակողմ հանդիպում անցկացնել Հայաստանի և Ադրբեջանի արտգործնախարարների հետ, բայց չի ստացվել: Այս մասին Բորելը հայտարարել է Բրյուսելում ԵՄ-Հայաստանի գործընկերության խորհրդի նիստից առաջ:
«Քանի որ ինձ հետ շփվել են երկու նախարարներն էլ, մենք փորձել ենք հաստատել եռակողմ կապ՝ Եվրամիություն, Հայաստան, Ադրբեջան: Դա հնարավոր չի եղել, այդ պատճառով ես երկու նախարարների հետ շփվում եմ առանձին»,- ասել է նա:
Բորելը նշել է, որ Ռուսաստանի օգնությամբ ձեռք բերված հրադադարի համաձայնությունը կանխել է հետագա մարդկային կորուստները, և այն պետք է ամբողջությամբ պահպանվի: «Բայց անցյալ շաբաթ, ցավոք, մենք երկու կողմերից էլ լսեցինք տեղեկություններ հրադադարի խախտման մասին: Կրակի դադարեցման ռեժիմի լիարժեք պահպանումը մնում է հրատապ անհրաժեշտություն»,- ընդգծել է նա:
«Եթե մենք կարող ենք ունենալ մեր դերը հաշտության, խաղաղության վերականգնման և ամրապնդման գործում՝ համալրելով Մինսկի խմբի ջանքերը, ապա ԵՄ-ն պատրաստ է դա անել,- ասել է Բորելը:- Եվրամիությունը պատրաստ է համագործակցել ԵԱՀԿ Մինսկի խմբի և ցանկացած այլ մեկի հետ՝ իր ներդրումն ունենալու Կովկասում հակամարտության խաղաղ կարգավորման գործում»:
Կարդացեք նաև
Պատրաստեց՝ Վիկտորյա ԱՆԴՐԵԱՍՅԱՆԸ
