«Զինվորական դատախազ Վահե Հարությունյանը մեզ գործընկերաբար հրավիրեց երեք հոգանոց կազմով ներս մտնել եւ հանդիպել իր հետ, հարցեր տալ: Ասացինք, որ երեսունից ավելի ենք, ամեն մեկն ունի իր հարցերը, չենք կարող որոշել, թե ովքեր են երեք հոգին: Խնդրեցինք, որ ինքն իջնի եւ պատասխանի հարցերին: Նոր ստացա վերջնական մերժում, որ չի կարող, նպատակահարմար չի գտնում իր գործընկերների մոտ իջնել»,-լրագրողների հետ զրույցում ՀՀ զինվորական դատախազության առաջ այսօր ասաց իրավապաշտպան Ռուբեն Մելիքյանը:
Հիշեցնենք, որ երեսունից ավելի իրավաբաններ հետպատերազմյան զարգացումների վերաբերյալ հարցեր էին ցանկանում հղել զինվորական դատախազին:
«Մոտեցումն ընդունում ենք ի գիտություն: Նույն օրակարգով այսօր 16:00-ին գնալու ենք նաեւ գլխավոր դատախազություն, խնդրելու ենք, որ իջնի եւ պատասխանի մեր հարցերին: Ի՞նչ իրավական ընթացակարգեր կան, ե՞րբ է իրավական գնահատական տրվելու այս խայտառակ հայրենազրկմանը»,-հավելեց Ռուբեն Մելիքյանը:
Լուիզա ՍՈՒՔԻԱՍՅԱՆ
