«Հայկ Մարությանի ներկայացրած բյուջեով 2021 թվականի համար նախատեսվել է շուրջ մեկ միլիարդ դրամ պարգեւատրման ֆոնդ»,- ֆեյսբուքյան իր էջում այսպիսի գրառում էր արել Երեւանի ավագանու «Լույս» խմբակցության անդամ Դավիթ Խաժակյանը:
Այս առնչությամբ Aravot.am-ը պարզաբանումներ խնդրեց Երեւանի քաղաքապետի մամլո խոսնակ Հակոբ Կարապետյանից:
Պարոն Կարապետյանը Դավիթ Խաժակյանի ձեւակերպումը հստակեցրեց՝ եկող տարվա բյուջեի նախագծում մեկ միլիարդ դրամով կրճատվել է պարգեւավճարային ֆոնդը: Այսինքն, ըստ պարոն Կարապետյանի, նախորդ տարիներին այդ ֆոնդը կազմել է 2 միլիարդ դրամ կամ՝ շուրջ երկու միլիարդ. «Այս նախագծով առաջարկվում է շուրջ մեկ միլիարդ դրամի չափով պարգեւավճար:
Պարգեւավճարային ֆոնդ չի նշանակում, որ այդ ֆոնդը սպառվել է ամբողջությամբ կամ այդ ֆոնդն ամբողջությամբ ծախսվելու է պարգեւավճարների վրա: Օրինակի համար նշեմ, որ 2020 թվականի պարգեւավճարային ֆոնդից մոտ 200 միլիոն դրամ հատկացվել է կորոնավիրուսային վարակի դեմ պայքարող բուժանձնակազմի վարձատրությանը, 100 միլիոն դրամ պատերազմի առաջին օրերին հատկացվել է Ստեփանակերտի վերականգնմանը»:
Հակոբ Կարապետյանը նաեւ ասաց. «Ուզում եմ հիշեցնել, որ դա մեկ տարվա ընթացքում քաղաքապետարանի 2000 աշխատակիցների, այսինքն՝ 2000 ընտանիքի սոցիալական բեռը թեթեւացնելուն ուղղված ֆոնդ է, որը կարող է ծախսվել կարող է չծախսվել, չհաշված՝ դա դեռ նախագիծ է եւ կարող է ավագանին չհաստատի»:
Կարդացեք նաև
Լուսինե ԲՈՒԴԱՂՅԱՆ
