«Նիկոլ Փաշինյանի իշխանությունը տարածվում է երկուսուկես շենքի վրա. մեկը կառավարության շենքն է, որն ինքը ճաղավանդակներով է պատել ու պախկվել ներսում, մյուսը կառավարական թանկարժեք վերանորոգված առանձնատուն է, որտեղ ինքն իրեն թույլ է տալիս տարբեր տիպի տարածված տեղեկություններով գժություններ և միայն ոստիկանության այցից հետո է խելքի գալիս: Այն կես շենքը, որին նա տիրապետում է և որի վրա իշխանություն ունի, դա Ազգային ժողովի մի փոքրիկ հատվածն է»,- «Արժանապատվության երթի» ժամանակ հայտարարեց քաղաքագետ Անդրանիկ Թեւանյանը:
Հիշեցնենք, մայրաքաղաքի Սասունցի Դավթի հրապարակից այսօր կրկին «Արժանապատվության երթ» տեղի ունեցավ: Բողոքի ցույցի կազմակերպիչն էր «Հայրենիքի փրկության շարժում» 17 կուսակցությունների միավորումը: Նիկոլ Փաշինյանի հրաժարականի պահանջով քաղաքացիները Սասունցի Դավիթ հրապարակից շարժվում են դեպի Ֆրանսիայի հրապարակ: Երթը ուղեկցում են բավական շատ թվով ոստիկաններ: Երթի մասնակիցները քաղաքացիներին կոչ էին անում միանալ Նիկոլ Փաշինյանի հրաժարականի պահանջին:
Երթին եւ Նիկոլ Փաշինյանի հրաժարականի պահանջին միանալու կոչ Անդրանիկ Թեւանյանը նաեւ իշխող «Իմ քայլը» խմբակցության պատգամավորներին ուղղեց: Ըստ նրա, միանալով այդ պահանջին, իշխող ուժի պատգամավորներն իրենց վրայից դավաճանի խարանը կմաքրեն. «Դուք դեռևս ժամանակ ունեք Հայաստանում կայունություն ապահովելու և վերացնելու անտերությունն ու անիշխանությունը: Որոշ ժամանակ հետո դուք ամբողջությամբ կիսելու եք պատասխանատվությունը»:
Նելլի ԳՐԻԳՈՐՅԱՆ
