Վարչապետ Նիկոլ Փաշինյանն այսօր ժամանել էր ԱԺ ու հանդիպել իմքայլական պատգամավորների հետ: Հանդիպումից հետո լրագրողների հետ զրույցում «Իմ քայլը» խմբակցության պատգամավոր Նազելի Բաղդասարյանն ասաց, որ քննարկման հիմնական թեման պետք է լիներ «Ընտրական օրենսգիրքը», բայց քանի որ կային ավելի հրատապ օրակարգային խնդիրներ, քաղաքական թիմը, նախարարները ներկա էին, թեման եւ խոսակցությունը զարգացավ այլ ուղղությամբ. «Մասնավորապես, քննարկվել են այն խնդիրները, որոնք վերաբերում էին ներքաղաքական հարցերին, սահմանում տիրող իրավիճակին: Գիտեք, որ նախօրեին գերիների մեծ խմբաքանակի վերադարձ է եղել, քննարկել ենք հաջորդ փուլերի տրամաբանությունը եւ ինչ գործողություններով ենք առաջ գնալու»:
Նազելի Բաղդասարյանը նշեց, որ եթե մյուս խմբակցությունների անդամները եւս ցանկություն կունենան հանդիպել կառավարության անդամների հետ, ապա կառավարության անդամները համաձայնություն կտան. «Նախաձեռնությունը եղել է ֆրակցիայի կողմից»:
Հարցին՝ ինչպե՞ս ստացվեց, որ եւս երկու գյուղ հայտնվեց Ադրբեջանի վերահսկողության տակ, խոսքը Խծաբերդ եւ Հին Թաղերի մասին է՝ Նազելի Բաղդասարյանը պատասխանեց. «Իրականում որոշակի հատվածներում, որտեղ դեռ չճշտված մոտեցումներ կան՝ կապված, թե այդ տարածքների հանդեպ ինչպիսի վերահսկողություն է լինելու, այս պահին քննարկվում է ռուս խաղաղապահների հետ, որպեսզի տեղաբաշխումը լինի ամբողջ ծավալով, որպեսզի նման խնդիրները, որին մենք հանգստյան օրերին ականատես եղանք, դա բացառենք: Սրա առիթով վարչապետն ուղիղ կապի մեջ է ՌԴ նախագահի հետ եւ գործողությունների եւ քայլերի տրամաբանությունը քննարկվում է: Այս պահին այդ երկու գյուղերում ամբողջովին իրավիճակը վերահսկելի է, մեր ունեցած վերջին տվյալներով՝ այս պահի դրությամբ այնտեղ ռուս խաղաղապահներն են: Այն տարածքներն են, որոնք եղել է վիճելի նախորդող ժամանակահատվածում»: Իսկ թե ինչու էին վիճելի՝ Բաղդասարյանը պատասխանեց, որ իրավասու չէ ասել:
Խոսելով «Ընտրական օրենսգրքի» մասին՝ Նազելի Բաղդասարյանն ասաց, որ չեն բացառում որեւէ փուլում արտահերթ ընտրությունները:
Կարդացեք նաև
Ինչ վերաբերում է ռազմագերիների խնդրին, նա վստահեցրեց, որ մոտ ժամկետում փոխանակման երկրորդ փուլն է նախատեսվում. «Օրերի հարց է անգամ»:
Հռիփսիմե ՋԵԲԵՋՅԱՆ
