Հայաստանի և նրա դաշնակից Լեռնային Ղարաբաղի ուժերը լայնորեն կիրառել են կլաստերային զինամթերք Ադրբեջանի բնակելի շրջաններում, ինչը պատերազմական օրենքների խախտում է: Այս մասին ասվում է Human Rights Watch իրավապաշտպան կազմակերպության հայտարարության մեջ:
Նոյեմբերին Ադրբեջան կատարած այցի ընթացքում Human Rights Watch-ի հետազոտողները գրանցել են կլաստերային զինամթերքի օգտագործման 4 հարձակում երեք շրջաններում (Թարթառ, Բարդա, Գերեմբոյ): Դրանց հետևանքով զոհվել է առնվազն 7 քաղաքացի, այդ թվում երկու երեխա, վիրավորվել է մոտ 20 մարդ, այդ թվում երկու երեխա:
«Կլաստերային ռազմամթերքը դաժան զենք է, որն արգելված է միջազգային համաձայնագրերով, և դրանց օգտագործումը ցույց է տալիս աղաղակող անհարգալից վերաբերմունք քաղաքացիական կյանքերի նկատմամբ,- ասել է կազմակերպության՝ Եվրոպայի և Կենտրոնական Ասիայի հարցերով տնօրեն Հյու Ուիլյամսոնը:- Թե՛ Ադրբեջանը, թե՛ Հայաստանը պետք է անհապաղ հանձնառություններ ստանձնեն չօգտագործել կլաստերային զինամթերք և միանան դրանք արգելող համաձայնագրերին»:
Չնայած Human Rights Watch-ը հնարավորություն չի ունեցել արձանագրելու՝ արդյոք ազդեցության գոտիներում կամ դրանց հարևանությամբ հարձակման պահին եղել է զինվորական անձնակազմ, սարքավորումներ կամ տեխնիկա, այնուամենայնիվ, կասետային զինամթերքի կիրառման ոչ ընտրական բնույթը պատերազմական օրենքների խախտում է՝ անկախ նրանից, արդյոք այդ շրջաններում եղել են լեգիտիմ ռազմական թիրախներ, թե ոչ:
Կարդացեք նաև
Նոյեմբերի 27-ին Երևանում Human Rights Watch-ի հետ հանդիպմանը Հայաստանի ԱԳՆ-ից հերքել են, որ Հայաստանն իր զինանոցում կլաստերային զինատեսակներ ունի:
Ռազմավարական հետազոտությունների միջազգային ինստիտուտի Military Balance 2020 ամենամյա պարբերականի տվյալներով՝ Հայաստանն ունի «Տոչկա» և «Իսկանդեր» բալիստիկ հրթիռներ, ինչպես նաև «Սմերչ» և չինական արտադրության WM-80 հրթիռային նռնականետեր, որոնք կարող են կրել կլաստերային մարտագլխիկներ: Human Rights Watch-ի ունեցած տեղեկություններով՝ Լեռնային Ղարաբաղի ուժերը չունեն կլաստերային զինամթերք, ուստի, ըստ ամենայնի Լեռնային Ղարաբաղին դրանք մատակարարել է Հայաստանը:
Պատրաստեց՝ Վիկտորյա ԱՆԴՐԵԱՍՅԱՆԸ
