«Սեպտեմբերի 27-ից նոյեմբերի 28-ը եղել եմ ռազմական գործողությունների գոտում: Սրտիցս սեւ արյուն է կաթում, որովհետեւ վերջին հինգ շաբաթը կանգնած ենք եղել Քիրսավան-Խծաբերդ ճանապարհին: Պահել ենք այն հողը, որտեղ այսօր թուրքն է մտել»,-«Ազգային ժողովրդավարական բեւեռի» նախաձեռնած «Պարտությունից հաղթանակ» խորագրով հանրային լսումների ժամանակ այսօր հայտարարեց ռազմարդյունաբերական կոմիտեի նախկին ղեկավար Ավետիք Քերոբյանը:
Պատերազմից հետո անհրաժեշտ գործողությունների վերաբերյալ նրա մոտեցումն է՝ պետական կառավարման համակարգի, զինված ուժերի, անվտանգության համակարգի բարեփոխումներ: «Անհրաժեշտ է ընդհանուր աշխարհաքաղաքական շահերի շուրջ դաշնակիցների հավաքագրում: Հայությունը պետք է համախմբվի ազգային գաղափարախոսության շուրջը՝ հայրենիքի պաշտպանության գաղափարի: Եղածի պատճառները պետք է բացառել՝ կրկնությունը բացառելու համար: Շատերը գուցե չհամաձայնեն, բայց մեղավորներին պետք է գտնել ու պատժել»,-հավելեց նա:
Լուիզա ՍՈՒՔԻԱՍՅԱՆ
