«Քոչարյանի ռեժիմի հետեւանքով 15 տարի է՝ ԱՄՆ-ում եմ: Գալիս եմ միայն գրքեր տպագրելու նպատակով: Թե ինչու եմ ընկել վտարանդության նավը, պատճառը քսան տարի առաջ պարոն Արկադի Վարդանյանի հայտնի պայքարին եւ հանրահավաքին մասնակցելն էր հոկտեմբերի երեսունին: Այդ ժամանակ նա ձերբակալվեց, մասնակիցները հետապնդումների ենթարկվեցին: Ես էլ հալածանքների ենթարկվեցի»,-«Ազգային ժողովրդավարական բեւեռի» նախաձեռնած «Պարտությունից հաղթանակ» խորագրով հանրային լսումների ժամանակ այսօր հայտարարեց բանաստեղծուհի Անահիտ Քնարյանը:
Նա անդրադարձավ Արցախի վերաբերյալ եռակողմ հայտարարությանը. «Մեկ գիշերում հայրենիքի մի հատվածը հանձնվեց: Դրանից հետո մե՞նք ենք մեղավոր, որ նա շարունակում է մնալ: Այո, նաեւ մենք ենք մեղավոր, որ ժամանակին Սերժ Սարգսյանից հետո եկավ այս բախտախնդիրը: Ինձ համար տարօրինակ է, որ արդեն ՀՀ սահմանների եւ Մեղրիի խնդիրն է դրված»:
Հիշեցնենք, որ Անահիտ Քնարյանին հանրահավաքի հաջորդ օրը հեռացրել էին աշխատանքից: Նա աշխատել էր Սարդարապատի հուշահամալիրի թանգարանում:
Լուիզա ՍՈՒՔԻԱՍՅԱՆ
