«Ընկեր Նիկո′լ, նո՞ր ես սուգ հայտարարում»,-«Հայելի» ակումբում հրավիրված մամուլի ասուլիսում հայտարարեց Սաթենիկ Խլղաթյանը: Նա Արցախյան առաջին պատերազմի ժամանակ կորցրել է իր ամուսնուն և միայնակ մեծացրել իր երեք երեխաներին:
Նա, խոսելով իրենց հասցեին հնչող վիրավորանքների մասին, որոնք արվում են ֆեյքերի կողմից, ասաց. «Չեմ պատկերացնում՝ լինի կին, որ կարողանա հայհոյանքներ հնչեցնել սևազգեստ մայրերի հասցեին: Չեմ պատկերացնում, որ երկրի ղեկավարն ուզենա զոհվածի ընտանիքին վարկաբեկելով կայանալ»:
Սևազգեստ կինը վստահեցրեց՝ իրենք այս հայրենիքի ոչ թե պարտված, այլ հաղթանակած սևազգեստ մայրերն են. «Մեր տղաներն իրենց կյանքի գնով տվեցին ազատություն: Իմ ամուսինը զոհվել է՝ թողնելով երեք որբ, երկու հարազատ քույրերիս երեխաները զոհվել են, իմ որդին վիրավոր է: Սրանով ինչի՞ չի զբաղվում Նիկոլ Փաշինյանը, հանկարծ հիշել է, որ կարող է երեք ամիս հետո գնալ Եռաբլուր»: Նա վրդովված է՝ ինչո՞ւ մինչև հիմա որպես երկրի ղեկավար չմոտեցավ, չեկավ Եռաբլուր ցավակցելու զոհվածների ընտանիքներին:
Սաթենիկ Խլղաթյանը հայտարարեց՝ Նիկոլ Փաշինյանը մեր ամուսինների ազատագրած հողերը «սկուտեղի վրա» մատուցեց:
Կարդացեք նաև
Անդրադառնալով եռօրյա սուգ հայտարարելու մասին որոշմանը, նա, դիմելով ՀՀ վարչապետ Նիկոլ Փաշինյանին ասաց. «Ընկե′ր Նիկոլ, սուգը սեպտեմբերի 27-ից է, նո՞ր ես ուշքի գալիս, սուգ նո՞ր ես հայտարարում: Մենք սգի մեջ ենք այն օրվանից, երբ նստեցիր գահին: Ի՞նչ եռօրյա սգի մասին է խոսքը, ի՞նչ երեսով ես գնալու Եռաբլուր ու մեր տղաներին ի՞նչ պիտի ասես»:
Տաթև ՀԱՐՈՒԹՅՈՒՆՅԱՆ
