Ռուսաստանի հայերի միության նախագահ Արա Աբրահամյանը հայտարարել է, որ Փաշինյանի հեռացումը ոչ միայն ժողովրդի կամքն է, րոպե առաջ նրա հեռանալը բխում է նաև իր իսկ շահերից։ «Որքան շուտ դա տեղի ունենա, այնքան լավ բոլորիս համար և, առաջին հերթին, հենց իր՝ Փաշինյանի համար»,- ասել է միության նախագահ Արա Աբրահամյանը։
Անդրադառնալով Արա Աբրահամյանի հայտարարությանը, «Ժամանակ»-ի հետ զրույցում «Russia-armenia.info» լրատվական կայքի խմբագիր, հասարակական գործիչ Արամ Խաչատրյանը նշեց, որ Ռուսաստանի հայերի միությունը շատ բան է արել Հայաստանի և Արցախի համար, որի անդամներից շատերն ունեն Հայաստանի քաղաքացիություն, իրավունք ունի նման հայտարարությամբ հանդես գալ։
«Արա Աբրահամյանը նույնպես ունի ՀՀ անձնագիր, սա նշանակում է, որ ինքը իրավունք ունի նման հայտարարություններ անելու, քանի որ պատերազմի ժամանակ օդանավերով, ավտոմեքենաներով հսկայական օգնություն է հասցրել։ Ավելին՝ Մարտակերտի շրջանում քաղաք են ուզում կառուցել և փախստականներին տներով ապահովեն։ Հաշմանդամ զինվորների համար ռեաբիլիտացիոն կենտրոններ են ստեղծելու։ Ով՝ ով, բայց Ռուսաստանի հայերի միությունն իրավունք ունի նման հայտարարություններով հանդես գալու։ Սա բնավ չի նշանակում, թե միությունը մտնում է ներքին գործերի մեջ։ Արա Աբրահամյանը դա ասելով՝ նկատի է ունեցել Ռուսաստանի բոլոր հայկական համայնքների ցանկությունը,- ասաց Արամ Խաչատրյանը։ Նա նաև նշեց, որ ամեն տարի Հայաստանից 500000 հայ է գալիս Ռուսաստան աշխատելու, և հիմա համայնքը հիմնականում բաղկացած է վերջին 25 տարիներին Հայաստանից Ռուսաստան եկածներով, որոնք տիրապետում են Հայաստանի ներքաղաքական կյանքին։
Արամ Խաչատրյանը նշեց, որ ինքը թեև Ռուսաստանի հայերի միության անդամ չէ, բայց ամեն շաբաթ մասնակցում է քննարկումներին, 85 համայնքային ղեկավար ունեցող միությունից, ըստ Արամ Խաչատուրյանի, բոլորն են պահանջում Նիկոլ Փաշինյանի հրաժարականը․ «Հազար տեսակի համայնք ունենք, բայց այսօր բոլորն ասում են, որ միակ փրկությունն այն է, որ Փաշինյանը հրաժարական տա։ Բոլոր համայնքային ղեկավարները դա են պնդում։ Ամեն մեկը, տեսնելով Հայաստանի վիճակը, կարծում է, որ պետք է Փաշինյանը հրաժարական տա։ Շատերը, որոնք քննադատում են Փաշինյանին, նշում են, որ չեն ցանկանում նախկիններին տեսնել Հայաստանում իշխանության։ Մենք ցավում ենք մեր Հայաստանի հզորության, մեր Հայաստանի ապագայի համար։ Արա Աբրահամյանը արտահայտում է բոլոր համայնքային ղեկավարների ցանկությունը»,- հավելեց զրուցակիցս։
Սիրանույշ ՊԱՊՅԱՆ
Հոդվածն ամբողջությամբ՝ «Ժամանակ» օրաթերթի այսօրվա համարում:
