Այսօր ՀՅԴ Գյումրու երիտասարդական միության ներկայացուցիչները ժամը 11․35-ի սահմաններում կարճ ժամանակով փակել էին Գյումրու կենտրոնական Սայաթ-Նովա փողոցը, այնուհետ շարժվել Շահումյան փողոց, Հաղթանակի պողոտա՝ պահանջելով վարչապետ Նիկոլ Փաշինյանի հրաժարականը։ Նրանք վանկարկում էին․ «Նիկոլ, դավաճան»։
Aravot.am-ի հետ զրույցում Գյումրու ՀՅԴ կոմիտեի ներկայացուցիչ Կարեն Գալստյանն ասաց, որ ցույցն անցել է առանց միջադեպերի, ոստիկանության հետ որևէ բախում չի եղել։ Եղել են քաղաքացիներ, որոնք քննադատել են իրենց, այդ ճանապարհով երթևեկող 4-5 վարորդներ էլ միացել են իրենց ցույցին՝ հետաքրքրվելով, թե հաջորդ քայլը ո՞րն է լինելու։
Կարեն Գալստյանն ասաց, որ ցույցերը լինելու են շարունակական, մինչև որ վարչապետ Նիկոլ Փաշինյանը հրաժարական տա։
«Ազգային մտածելակերպ ունեցող նոր կառավարություն պիտի ձևավորվի, որն ի վիճակի է երկիրը դուրս բերել ճահիճից, որի մեջ հայտնվել ենք Փաշինյանի պատճառով։ Թուրքիան և Ադրբեջանը հայտարարում են իրենց նկրտումները Հայաստանի տարածքների վերաբերյալ՝ Զանգեզուր, Երևան, Սևան, իսկ մեր վարչապետը երեկ Անվտանգության խորհրդի նիստում ասում էր, թե Ադրբեջանի և Թուրքիայի հետ բարիդրացիական հարաբերություններ ստեղծենք։ Կարելի է ենթադրել մեկ պարզ բան, այսինքն՝ տալ պահանջածը, որպեսզի դրանից հետո փորձենք ավելի լավ ու խաղաղ ապրել։ Մենք դրան ոչ միայն պատրաստ չենք, այլև թույլ չենք տա»,-ասաց Կարեն Գալստյանը։
Կարդացեք նաև
Նունե ԱՐԵՎՇԱՏՅԱՆ
