«Այս տարիներին իշխող, կեղեքող համակարգին հաջողվել է մեր նման քաղաքական ուժերին եւ գործիչներին կպցնել հակառուսների պիտակ»,-«Ազգային ժողովրդավարական բեւեռ» շարժման՝ ԵԱՀԿ Մինսկի խմբի համանախագահների ժամանման առիթով հավաքի ընթացքում այսօր հայտարարեց «Սասնա ծռեր» համահայկական կուսակցության համահիմնադիր, արցախյան պատերազմի մասնակից Ժիրայր Սեֆիլյանը:
«Կարծում եմ՝ մենք հասել ենք մի հանգրվանի, որ այսօր ոչ միայն այդ պիտակներն են թափվելու, այլեւ վստահ եմ՝ ժողովրդի մեծ մասն իր աչքերը բացելու է»,-համոզմունք հայտնեց նա:
Սեֆիլյանի խոսքով. «Այն, ինչ կատարվեց վերջին երկու ամսում, շատերի միտքն է բացելու: Պետք չէ լինել այս կամ այն աշխարհաքաղաքական բեւեռի ծառան: Մենք վերջապես պետք է սովորենք մեր շահերին տեր լինել: Սա է այսօրվա գրավականը քաղաքականությամբ զբաղվելու եւ ապագա Հայաստանում կառավարելու: Այն պետությունը, որը հակադրվում է մեր շահերին, մեր համապատասխան վերաբերմունքին պետք է արժանանա: Ուստի այն, որ այսօր այստեղից կծու խոսքեր են հնչում Կրեմլի հասցեին, մենք եւ ժողովուրդը դրա իրավունքն ունենք: Այստեղ չկա հակառուսականություն, ոճրագործությունն իր անունով պետք է կոչել: Այսօր բոլորիս մեջ ծնվում է ապագա ինքնիշխան Հայաստանը»:
Լուիզա ՍՈՒՔԻԱՍՅԱՆ
