Ընտանեկան ճգնաժամի փուլերը տարբեր են, հոգեբանները վստահեցնում են՝ այդ ճգնաժամերի հաղթահարման կարևորագույն նախապայմանը փոխզիջումն է:
Aravot.am-ի «Ֆեմինի» նախագծի շրջանակներում անդրադարձել ենք ամուսնական կյանքի ճգնաժամերը հաղթահարելու հարցում հոգեբանների խորհուրդներին:
Ընդհանրապես այս ճգնաժամերը հոգեբանները համարում են բնականոն երևույթ ընտանիքի զարգացման գործընթացում, բայց նաև զգուշացնում են՝ դրանք կարող են ամուսնական զույգի համար ունենալ ճակատագրական ավարտ: Կարևոր է ճգնաժամային այս տարիների ընթացքում դրսևորել համբերություն, որպեսզի կտրուկ որոշումների և քայլերի չգնալ:
Ընտանեկան հոգեբան Եկատերինա Ուգոլևան ամենաճգնաժամային և բարդ տարին ամուսնական կյանքում համարում է ամուսնական առաջին տարին, երբ այսպես ասած՝ ընտանիքի չգրված օրենքների հիմքն է դրվում:
Հոգեբանները ամուսնական կյանքի ընթացքում որպես ճգնաժամային առանձնացնում են հատկապես ամուսնական համատեղ կյանքի հետևյալ շրջափուլերը.
- Ամուսնությունից 2-3 ամիս անց,
- Ամուսնությունից կես տարի անց,
- Ամուսնությունից մեկ տարի անց,
- Առաջնեկի ծնունդից հետո,
- Ամուսնությունից 3-5 տարի անց,
- Ամուսնության 7-8-րդ տարում,
- Համատեղ կյանքի 12-րդ տարում,
- Համատեղ ամուսնական կյանքի 20-25-րդ տարիներին:
Սակայն առավել սուր ճգնաժամեր են գրանցվում ամուսնական կյանքի 3-րդ և ամուսնական կյանքի 13-23-րդ տարիների ընթացքում:
3-ամյա հարաբերությունների ճգնաժամ
Ամուսնության 3-րդ տարում առաջացած ճգնաժամի պատճառը ռոմանտիկայի պակասն է, ամուսինները սկսում են իրենց դրսևորել ոչ այնպես, ինչպես սիրահարվածության ժամանակահատվածում, երբեմն առաջանում է խաբված լինելու զգացողություն:
Համատեղ կյանքի «կեսի» ճգնաժամ
Ամուսնական կյանքի 13-23-րդ տարիների ճգնաժամը բավականին վտանգավոր է: Այն բավականին երկար է տևում: Ամուսնական կյանքի ճգնաժամն այս դեպքում համընկնում է ամուսինների՝ միջին տարիքի ճգնաժամի հետ, որը տեղի է ունենում, երբ անձը մոտենում է 40-ին: Ավանսային ժամանակն ավարտվում է, անձին թվում է, թե չի կարող հասնել իր բոլոր նպատակներին և այլն:
Ամուսնական այս ճգնաժամային փուլի ընթացքում հոգեբանները հորդորում են ամուսնական զույգին չկենտրոնանալ իրենց տարիքի վրա և համատեղ կյանքում շեշտը դնել վայելքների և համատեղ հաճույքների վրա:
Ամուսնական կյանքում ճգնաժամերի հաղթահարման հարցում մասնագիտական տարբեր տեսակետներ կան: Սակայն տարբեր մասնագիտական մոտեցումներում ընդհանրությունը հետևյալն է. ամուսնական զույգը պետք է փորձի խնդիրների մասին զրուցել և իրավիճակը հաղթահարել ոչ թե պահի ազդեցության տակ, այլ ավելի սթափ վիճակում՝ խուսափելով կտրուկ որոշումներ կայացնելուց:
Տաթև ՀԱՐՈՒԹՅՈՒՆՅԱՆ
