Այսօր կեսօրին՝ ժամը 15․00-ի սահմաններում մի խումբ ընդդիմադիրներ՝ Կարապետ Պողոսյանի գլխավորությամբ, փակել էին Գյումրու Հայուհու հրապարակը՝ մի քանի րոպե կաթվածահար անելով քաղաքի կենտրոնական այս հատվածի երթևեկությունը։ Նրանք պահանջում էին վարչապետ Նիկոլ Փաշինյանի հրաժարականը։
Aravot.am-հ հետ զրույցում Կարապետ Պողոսյանն ասաց, որ երեքշաբթի օրվանից իրենք սկսել էին ըմբոստության ցույցերի շարք ու այսօրվա Հայուհու հրապարակը փակելը հենց այդ ցույցերի շարունակությունն է։
«Նպատակը եղել է մեր բողոքի ձայնը տեղ հասցնելը, միևնույն ժամանակ քաղաքացիներին իրազեկելը մեր ծրագրերի մասին։ Ճիշտ է՝ իր բնույթով ծայրահեղ ակցիա է, բայց այս իրավիճակում այլ ելք չկա, գուցե և ընթացքում նմանատիպ գործողությունները շատանան», ասաց Կարապետ Պողոսյանը։
Նա նաև տեղեկացրեց, որ որևէ անախորժություն, որևէ միջադեպ չի եղել: Այն վարորդներն էլ, որոնք ցույցի ընթացքում չէին կարողանում երթևեկել ու դժգոհել են, ընդդիմադիրները նրանց բացատրել են․ «Սա մեր պայքարի ձևն է, մեր հայրենիքը, երկիրը փրկելու միակ տարբերակը»։
Կարապետ Պողոսյանը պարզաբանեց․ «Մարդիկ մեծամասամբ մեզ հասկացել են, նույնիսկ մարդիկ կային, որոնք հեռախոսահամար վերցրեցին, որպեսզի հանդիպեն, աջակցեն։ Նույնիսկ ակցիայի ժամանակ դեպք եղավ, երբ մեքենայի վարորդն ու ուղևորներն ապակիները իջեցրեցին ու ասացին՝ եկել ենք ձեզ օգնելու»։
Նունե ԱՐԵՎՇԱՏՅԱՆ
