Ինչպես արդեն տեղեկացրել ենք, այսօր մայրաքաղաքի փողոցներում անհնազանդության երթեր էին: Ցուցարարների մեջ էր նաեւ «Հայրենիք» կուսակցության ղեկավար Արթուր Վանեցյանը: Լրագրողների հետ զրույցում նա ասաց, որ վճռական են եւ պայքարելու են այս «դավաճան իշխանությանը հեռացնելու համար»:
Վանեցյանը՝ դիմելով ՀՀ քաղաքացիներին, կրկին հայտարարեց, որ սա պայքար չէ իշխանության համար, սա պայքար է՝ հանուն հայրենիքի փրկության. «Վտանգված են ՀՀ սահմանները եւ հայ ժողովրդի գոյությունը: Բիրտ ուժի կիրառմամբ մեզ չեն կարողանալու վախեցնել եւ լռեցնել»: Նա բերման ենթարկվելուց չի վախենում:
Ցույցի ժամանակ ոստիկանությունը ուժ կիրառեց եւ քաղաքացիներին բերման ենթարկեց: Արթուր Վանեցյանը ոստիկանության գործողությունները անօրինական է որակում: Բայց նա կարծում է, որ ոստիկանների 95 տոկոսը ազնիվ մարդիկ են եւ մի օր կհասկանան՝ չի կարելի ծառայել այս իշխանությանը. «Սպան չի կարող լինել դավաճանի ենթակա: Սպան չի կարող կատարել դավաճանի հրամանները: Սպան չի կարող համաձայն լինել մեր հայրենիքը հանձնելուն: Սպան չի կարող հանգիստ նայել Բաքվի զորահանդեսին: Մենք ամբողջ կյանքներս թուրքի առաջ կզա՞ծ պիտի ման գանք: Սթափվեք: Ընկել ենք մի խմբակի ձեռքը կրակը: Խոսք է գնում Սյունիքը հանձնելու մասին: Թուրքական հեռուստատեսությամբ քարտեզ են ցույց տալիս, որտեղ չկան Սյունիքի մարզը, Գեղարքունիքի մարզի մի մասը»:
Ապա Երեւանի փոխոստիկանապետը մոտեցավ Արթուր Վանեցյանին: Փոխոստիկանապետի խնդրանքով՝ առանց լրագրողների նա եւ Արթուր Վանեցյանն ինչ-որ զրույց ունեցան: Ապա Արթուր Վանեցյանը հանրությանը կոչ արեց՝ միանալ ցույցին եւ այսօր եւեթ լուծել իշխանության հրաժարականի հարցը:
Կարդացեք նաև
Նա տեղեկացրեց, որ մի քանի հարյուր ցուցարար է բերման ենթարկվել եւ կոչ արեց ցույցի մասնակիցներին՝ առանց խուճապի մատնվելու՝ շարունակել խաղաղ ցույցը մայրաքաղաքի փողոցներում:
Նելլի ԳՐԻԳՈՐՅԱՆ
