«Այդ հայտարարությունների ազդեցությունն ավելի շատ տհաճ հետք թողեց այն ժամանակ, երբ, օրինակ, ՌԴ պաշտոնատար անձ Մարիա Զախարովան ավելի շուտ արձագանքեց այդ ստորացուցիչ արտահայտություններին, քան ՀՀ պատկան մարմինները: Ցավում եմ, որ կառավարության եւ վարչապետի մամուլի խոսնակի համար մոտ ութ ժամ պահանջվեց, որպեսզի անբովանդակ արձագանքով պատասխանեին Ալիեւին եւ Էրդողանին»,-խորհրդարանական ճեպազրույցների ժամանակ այսօր անդրադառնալով Թուրքիայի եւ Ադրբեջանի նախագահների՝ ՀՀ տարածքների եւ անվտանգության հանդեպ սպառնալիք եւ ոտնձգություններ պարունակող հայտարարություններին՝ ասաց «Բարգավաճ Հայաստան» խմբակցության պատգամավոր Իվետա Տոնոյանը:
«Ցավում եմ, որ երբ ասում են, թե Երեւանն ու Զանգեզուրը պատմական ադրբեջանական հողեր են, մեր կողմից ամենաբարձր մակարդակով արձագանք չի լինում: Փոխարենը, օրինակ, վարչապետը չի զլանում կորցրած օծանելիքի կամ ժամացույցի մասին գրառում անել, «լայվ» մտնել»,-նշեց Իվետա Տոնոյանը:
Կարդացեք նաև
«Բարգավաճ Հայաստանի» մեկ այլ պատգամավոր Արման Աբովյանն էլ ՀՀ իշխանությանը դիմեց. «Չի կարելի հակապետական հայտարարություններ անել մեր կողմից, թե պետք է դիվանագիտական հարաբերություններ հաստատել…խայտառակ անգրագիտություն է դա: Իրավիճակին չտիրապետելու ֆանտաստիկ ունակություն է դրսեւորում այս իշխանությունը: Վաղուց Ադրբեջանն ու Թուրքիան տարածքային հավակնություններ են ներկայացնում ՀՀ-ի հանդեպ: Երբ նման բաներ են ասում եւ ՀՀ տարածքը թուրքական տարածք համարում, ու այդ ֆոնին մեր կողմից հնչում է դիվանագիտական հարաբերությունների մասին խոսք, սա արդեն աննորմալության կանխավարկած է: Կամ չեն հասկանում, կամ միտումնավոր են անում: Մայրաքաղաքիդ հանդեպ բացահայտ տարածքային նկրտումներ ունեցողի հետ ի՞նչ դիվանագիտական հարաբերություն: Ադրբեջանն էլ միանշանակ պայման է դնելու, որ դու, իշխանությունը, պարտավորվելու է ընդունել Ադրբեջանի տարածքային ամբողջականությունը: Ադրբեջանը նախապայման է դնելու, առանց որի մեր ուզածը չի իրականանալու: Սա խայտառակ անգրագիտություն է: Չեմ հավատում, որ մերձեցման մասին խոսացողները դա չեն հասկանում: Բայց որ ասում են, ի՞նչ պատճառ կա: Թուրքերի հետ ի՞նչ պայմանով եք դիվանագիտական հարաբերություն հաստատելու: Թուրքիան, միանշանակ, պայման է դնելու ցեղասպանության հարցն օրակարգից հանել: Ադրբեջանն էլ ասելու է՝ ի՞նչ Արցախ, հենա քեզ ճանապարհ եմ տալիս, իսկ Արցախին՝ մշակութային ինքնավարություն: Ձեռ եք առնո՞ւմ մեզ: Բա խոսացեք, մենակ ընդդիմության մասի՞ն եք կարողանում խոսել»:
Լուիզա ՍՈՒՔԻԱՍՅԱՆ
