«Ինձ համար իրենք ժողովրդի մի հատվածն են»,-խորհրդարանական ճեպազրույցների ժամանակ այսօր պատասխանելով հարցին, թե վարչապետի հրաժարականը պահանջողները ժողովրդի մի մասը չե՞ն՝ ասաց «Իմ քայլի» պատգամավոր Բաբկեն Թունյանը:
Նա լրագրողներին հորդորեց հարցերը քառօրյայի օրակարգի շուրջ ձեւակերպել:
Հիշեցնենք, որ վարչապետ Նիկոլ Փաշինյանն օրերս անդրադառնալով իր հրաժարականի պահանջով բողոքի գործողություններին՝ նշել էր, թե հրապարակում չգտնվող քաղաքացիներն էլ են ժողովրդի ծանրակշիռ հատված:
Կարդացեք նաև
«Իմ քայլի» պատգամավոր Համազասպ Դանիելյանն էլ ի պատասխան նշյալ հարցին ասաց. «Կարծում եմ՝ հարցին տարբեր արձագանքներ են եղել: Ո՞վ է ժողովուրդը սահմանումը եւ ժողովրդի քաղաքական կամքը ձեւավորելու միակ ձեւը պարզ կարելի է տեսնել սահմանադրությունում: Դրա ձեւավորման երաշխիքն ընտրություններն են: Ժողովրդի տարբեր մասեր միաժամանակ կարող են տարբեր բաներ պահանջել: Դա ստուգելու միակ ձեւն ընտրություններ են»:
Այնուհետեւ «Փաշինյանի հրաժարականի հանրային պահանջ կա՞, ձեզ համար արժեքավո՞ր է չորս նախագահների, կաթողիկոսների, ընդդիմադիրների, քաղաքացիների կողմից վարչապետի հրաժարականի պահանջը» հարցին էլ Համազասպ Դանիելյանն այսպես պատասխանեց. «Ինձ համար արժեքավոր է ՀՀ ամեն քաղաքացու պահանջն ու ակնկալիքը, հատկապես եթե խոսում ենք այն քաղաքացիների մասին, որոնք այդ պահանջները ներկայացնում են հենց իրենցով, այլ ոչ թե տարբեր հանգամանքներով պայմանավորված»:
Լուիզա ՍՈՒՔԻԱՍՅԱՆ
