Զանգելանում անհայտ կորած 34 զինծառայողների հարազատները ծրագրում են կառավարության կամ պաշտպանության նախարարության մոտ հացադուլի նստել: Այդ մասին Aravot.am-ի հետ զրույցում ասաց անհայտ կորած զինվորներից մեկի մայրը՝ տիկին Անահիտը:
Հիշեցնենք, պայմանագրային եւ ՄՈԲ-ի համալրումով Էջմիածնի «քիմիական» զորամասից ռազմաճակատ մեկնած եւ անհայտ կորածների հարազատները այսօր կրկին Էջմիածնում, զորամասի մոտ էին հավաքվել: Պատերազմի առաջին օրերին այս զորամասից 60 հոգի ռազմաճակատ է մեկնել, 34-ից առ այսօր տեղեկություն չկա:
Երկու օր առաջ, անհայտ կորածների հարազատները մինչեւ ուշ գիշեր Պաշտպանության նախարարության մոտ էին եւ պահանջում էին հանդիպում ռուս խաղաղապահների հրամանատար գեներալ-լեյտենանտ Ռուստամ Մուրադովի հետ: Գնդապետ Սամվել Ասատրյանը նրանց պատասխանել էր, որ Մուրադովը մեկնել է Բաքու՝ Ալիեւի հետ գերեվարվածների եւ անհետ կորածների հարցերով խորհրդակցի: Մուրադովը Բաքվից գալու էր Հայաստան: ԳՇ պետը խոստացել էր, որ Մուրադովի հետ հանդիպումից այսօր անհայտ կորածների հարազատներին մանրամասներ փոխանցի:
Թեեւ անհայտ կորածների հարազատներին առավոտյան ժամը 11.00-ին էին հրավիրել Էջմիածնի զորամաս, սակայն, Սամվել Ասատրյանը մի քանի ժամ անց նոր եկավ զորամաս:
Կարդացեք նաև
Իր ուշանալը, Սամվել Ասատրյանը բացատրել էր այսպես. «Ես ասեցի, որ գալիս եմ, հո չասեցի որ Երեանից եմ գալիս»:
Տիկին Անահիտը պատմում է, որ Սամվել Ասատրյանը իրենց հորդորել է ցույցեր չանել, աղմուկ չբարձրացնել, քանի որ աղմուկը խանգարում է գործընթացին, հակառակորդ կողմը դրանից պտուղներ է քաղում: «Բայց մենք չենք լռելու, էլ ի՞նչ լռենք այսքանից հետո: Ակնկալիք ունեմ, որ այսօր կամ վաղն առավոտյան կհանդիպեմ Օնիկ Գասպարյանի հետ ու դրանից կախված կհստակեցնենք մեր հետագա անելիքները. կառավարության կամ նախարարության շենքի մոտ հացադուլ կանենք»,- պատմեց տիկին Անահիտը՝ հավելելով, որ Մուրադովի հետ բուն պայմանավորվածությունների մասին ակնկալում են տեղեկություն ստանալ ԳՇ պետ Օնիկ Գասպարյանի հետ հանդիպման ժամանակ:
Նելլի ԳՐԻԳՈՐՅԱՆ
