Ադրբեջանից և Հայաստանի մրգերի ու բանջարեղենի ներմուծման արգելքը ոչ թե Կրեմլի հարցն է, այլ պրոֆիլային գերատեսչության: Այս մասին հայտարարել է Ռուսաստանի նախագահի մամուլի խոսնակ Դմիտրի Պեսկովը՝ հավելելով, որ պրոֆիլային գերատեսչությունը պարտավոր չէ իր գործողությունները համաձայնեցնել Կրեմլի հետ:
«Բնական է, որ ամեն ինչ արվում է կառավարության հետ գործակցությամբ, կան հստակ չափանիշներ, որոնցով ընդունվում են նման որոշումները: Դուք գիտեք, որ այդ որոշումները կապված են վիրուսների հետ, և համավարակի պայմաններում, իհարկե, մենք դրա վրա հատուկ ուշադրություն ենք դարձնում: Ուստի, ոչ մեկը չունի նման պարտավորություն՝ իր գործողությունները համաձայնեցնել Կրեմլի հետ»,- ասել է Պեսկովը:
Հիշեցնենք, ավելի վաղ հայտնի էր դարձել, որ «Ռոսսելխոզնադզորը» ժամանակավորապես արգելել է Հայաստանի Արմավիրի մարզից լոլիկի ու պղպեղի, իսկ Ադրբեջանից՝ լոլիկի և խնձորի ներմուծումը:
Պատրաստեց՝ Վիկտորյա ԱՆԴՐԵԱՍՅԱՆԸ
