Կառավարության այսօրվա նիստում հաստատվեց Ադրբեջանի կողմից 2020 թվականի սեպտեմբերի 27-ին սանձազերծված ռազմական գործողությունների հետեւանքով անհետ կորած զինծառայողների ընտանիքների աջակցության միջոցառումը: Ինչպես նիստում ներկայացրեց աշխատանքի և սոցիալական հարցերի նախարար Մեսրոպ Առաքելյանը՝ միջոցառման նպատակն է սոցիալական աջակցություն տրամադրել Ադրբեջանի կողմից 2020 թվականի սեպտեմբերի 27-ին սանձազերծված ռազմական գործողությունների հետեւանքով անհետ կորած զինծառայողների ընտանիքների անդամներին։ Աջակցությունը կտրամադրվի ամենամսյա դրամական օգնության ձեւով՝ յուրաքանչյուր զինծառայողի հաշվով ամսական 300 000 դրամ 6 ամսվա համար: Գումարը կտրամադրվի Զինծառայողների ապահովագրության հիմնադրամից, որին կտրամադրվի 500 միլիոն դրամ:
Վարչապետ Նիկոլ Փաշինյանի խոսքով, անհետ կորած զինծառայողները նույնպես համարվում են հիմնադրամի շահառուներ, բայց, քանի որ դրա համար որոշ ընթացակարգեր են սահմանված, ինչի համար ժամանակ կպահանջվի, օրենսդրության մեջ որոշ փոփոխություններ են կատարել, որպեսզի այդ կարգավիճակը ստանան անհետ կորած զինծառայողները. «Բայց, քանի որ, անկախ ամեն ինչից, դա մի քանի ամիս տեւելու է, մենք որոշում ենք կայացրել, որ բյուջեից հիմնադրամին գումար կփոխանցվի, որ հիմնադրամը նման կարգավիճակի հավանականություն ունեցող անձանց ընտանիքներին ամսական 300 հազար դրամ աջակցություն տա, մինչեւ հիմնադրամի հետ իրենց կարգավիճակը կհստակեցվի»:
Ըստ վարչապետի, այս այդ ցանկում կներառվեն նաեւ գերեվարված անձանց ընտանիքիները, որ նրանք նույնպես հնարավորություն ունենան օգտվել նույն սկզբունքներից:
Կարդացեք նաև
Լուսինե ԲՈՒԴԱՂՅԱՆ
