«Դատավորի ընտրություն պետք է տեղի ունենար, բայց հարցը դուրս է եկել: Մամուլում տեղեկություններ կան այն մասին, որ դատավորները հրաժարվում են այս խորհրդարանի կողմից ընտրվելուն մասնակցել: Կպարզաբանե՞ք»,-ԱԺ նիստում այսօր խորհրդարանի նախագահ Արարատ Միրզոյանին նման հարցադրմամբ դիմեց «Լուսավոր Հայաստան» խմբակցության ղեկավար Էդմոն Մարուքյանը:
Միրզոյանը պատասխանեց. «Վճռաբեկ դատարանի նախագահի եւ դատավորի թեկնածուների ընտրության հարցի՝ օրակարգից դուրսբերման վերաբերյալ տեղեկացնեմ, որ բարձրագույն դատական խորհրդի նախագահն ինձ նամակ է գրել: Նախ մեզ տեղեկացրել է, որ թեկնածուները նիստի մասին իրազեկվել են հեռախոսազանգով, ինչը պատշաճ չեն համարել եւ չեն հասցրել պատրաստվել: Նշվում է, որ ԱԺ լիագումար նիստում տեսլական ներկայացնելիս պետք է խոսեն դատական համակարգի խնդիրների մասին, դատարանների ծանրաբեռնվածության ու նյութատեխնիկական խնդիրների մասին, սակայն հաշվի առնելով հետպատերազմյան վիճակը եւ ավելի հրատապ հարցերի շրջանակը՝ իրատեսական չէ կառուցողական ու արդյունավետ քննարկում կազմակերպելը: Եվ ԲԴԽ նախագահն իր ու թեկնածուների անունից խնդրում է հարցը հետաձգել: Մենք էլ ընդառաջում ենք»:
Լուիզա ՍՈՒՔԻԱՍՅԱՆ
