Վարչապետի հրաժարականի մեկ պահանջ էլ Մարմաշեն խոշորացված համայնքի ղեկավար Կարեն Արշակյանն է տարածել: Հայտարարության մեջ ասված է.
«Հայաստանի Հանրապետության Շիրակի մարզի Մարմաշեն համայնքի ղեկավար Կարեն Արշակյանը, համայնքապետարանի աշխատակազմը, ավագանու անդամների և վարչական ղեկավարների գերակշիռ մեծամասնությունը միացել են Հայաստանի Հանրապետության բազմաթիվ համայնքներին և պահանջում են Հայաստանի ապազգային և ապաշնորհ իշխանությունների` վարչապետի և կառավարության անհապաղ հրաժարականն ու անցնցում հեռացումը»:
Մարմաշենցիների անունից չի արել հայտարարությունը, քանի որ նրանց հետ չի հանդիպել, չի խոսել:
ՀՅԴ կուսակցության անդամ լինելն արդյո՞ք ունեցել է ազդեցություն նման հայտարարության տարածման համար՝ ՀԺ-ի հարցին պատասխանելով, համայնքապետն ասաց՝ ոչ: Հայտարարության տարածման միակ և հիմնական պատճառն, ըստ նրա, եղել է Արցախի տարածքների հանձնումն ու պատերազմի ելքը:
Կարդացեք նաև
«Եթե կա մեկը, որ սրտի ցավով չի ընդունում էսօրվա իրավիճակը ու ճիշտ է համարում Կառավարության մոտեցումը նրան, ինչ որ եղավ, ուրեմն ես, ավագանու անդամները սխալվում ենք: Ես կընդունեմ էն ղեկավարին, որը սահմանների հետ խնդիրներ չի ունենա, կտանի տնտեսությունը զարգացման, չի պառակտի երկիրը: Մեր տղեքը հիմի էլ կանգնած են սահմանին վրանների մեջ: Ոչինչ չկա այնտեղ, ոչ մի բան, ոչ վառելիք, ոչ վառարան, ամեն ինչը մենք ենք կազմակերպել ու տարել, ես երկու օր առաջ եմ եկել: Ընդհանուր առմամբ, ես ճիշտ չեմ համարում էսօրվա շարունակությունը»,- ասաց Արշակյանը:
Կարեն Արշակյանը Մարմաշենի կազմի մեջ մտնող 15 բնակավայրի բնակիչների հետ ոչ հանդիպել, ոչ խոսել է այս հայտարարության մասին: ՀԺ-ի հետ զրույցում Մայիսյանի բնակչուհի Էլիզա Ներսիսյանն ասաց՝ իրենք զայրացած, նաև վիրավորված են, որ նման հայտարարություն է տարածվել:
«Մենք Մայիսյանից ենք, ու հրաժարական չենք պահանջել, ու ասեմ, որ ժողովրդի 90 տոկոսը վարչապետի հետ է, չկա հրաժարականի պահանջ, թե ինչու մի քանի հոգու կհրահրեն, էդ էլ մենք տեղյակ չենք: Մենք համայնքապետին ասել ենք, որ մեր անունից հանկարծ հայտարարություններ չանեք»,- ասաց զրուցակիցը:
Հոդվածն ամբողջությամբ՝ «Հայկական ժամանակ» օրաթերթի այսօրվա համարում
