«Սահմանամերձ համայնքների բնակիչներն ինչո՞ւ են ադրբեջանական զինուժի դիմաց մենակ մնացել սահմանազատման աշխատանքներում: Ադրբեջանցիները GPS-ով են Հայաստանի հետ սահմանները որոշում: Սոթքի ոսկու հանքի ճակատագիրն ի՞նչ է լինելու: Հանքը մասամբ է աշխատում, որովհետեւ սահմանի հարցը լուծված չէ»,- կառավարություն-ԱԺ հարցուպատասխանի ժամանակ այսօր հարցադրումներ հղեց «Իմ քայլը» խմբակցությունից դուրս եկած պատգամավոր Թագուհի Թովմասյանը: Փոխվարչապետ Տիգրան Ավինյանը պարզաբանեց. «Որոշակի ճշգրտում է տեղի ունեցել եւ հանքավայրի տարածքի մի հատվածից երկու կողմերի զինված ուժերն ավելի ճշգրիտ են դիրքավորվել, եւ վարչական շենքը գտնվում է հայկական կողմում:
Հանքի շահագործման հետ կապված հարցերը նույնպես ունեն իրավական հիմնավորումներ եւ փաստաթղթեր, եւ դրանք նույնպես բանակցային գործընթացի հարցեր են, առաջիկայում, կարծում եմ, կքննարկվեն: Ինչ վերաբերում է բնակիչներին մենակ թողնելուն, զինված ուժերն ու մեր ռուս գործընկերներն այդ գործընթացին մասնակցում են: Հազար ու մի հարցեր կան, որովհետեւ իրավական սահմանը ֆիքսված չէ: Հարցերին այսպիսի ժամանակավոր լուծումներ են տրվում»:
Լուիզա ՍՈՒՔԻԱՍՅԱՆ
