«Այս պահին ողջ սահմանի երկայնքով միջգերատեսչական խումբ է աշխատում: Սահմանի ողջ երկայնքի վերաբերյալ իրավական փաստաթղթեր են սպասվում գալիք բանակցությունների շրջանակում, որոնք, ամենայն հավանականությամբ, կլինեն այս տարի՝ ռուս գործընկերների միջնորդությամբ եւ երկու կողմերի միջեւ»,-կառավարություն-ԱԺ հարցուպատասխանի ժամանակ այսօր անդրադառնալով ՀՀ-ի եւ Ադրբեջանի միջեւ սահմանազատման աշխատանքներին՝ ասաց ՀՀ փոխվարչապետ Տիգրան Ավինյանը:
«Իրավական սահման, որպես այդպիսին, ՀՀ-ի եւ Ադրբեջանի միջեւ վերջնական արձանագրված չէ: Մենք վերհանել ենք բոլոր իրավական փաստաթղթերն ու քարտեզները, որոնք հիմք են հանդիսանալու բանակցություններում, եւ այդ օրակարգով մոտակա շաբաթներին կլինեն բանակցություններ»:
Ինչ վերաբերում է ՀՀ սահմանին ԶՈՒ տեղակայմանը, Ավինյանը նշեց. «Սյունիքի մարզի Տեղ գյուղի ներքեւի հատվածի տարբեր դիրքերում ունենք ԶՈՒ ներկայացուցիչներ, որոնց վերջնական տեղակայումները տեղի են ունենալու պայմանավորվածությունների եւ բանակցությունների արդյունքում: Դա ողջ սահմանին է վերաբերում»:
Ավինյանը տեղեկացրեց, որ հնարավորինս տեսանելի կլինի միջգերատեսչական խմբի աշխատանքը: «ՀՀ սահմանից այս կողմ որեւէ բան զիջված չէ եւ չի կարող լինել: Նաեւ հստակեցնեմ, որ իրավական սահմանը բանակցությունների արդյունքում երկու կողմերը կընդունեն վերջնական փաստաթղթի տեսքով»,-հավելեց նա:
Կարդացեք նաև
Լուիզա ՍՈՒՔԻԱՍՅԱՆ
